Styður ekki heilbrigðisþjónustu sem byggð er upp í gróðaskyni

Ekki verða gerðir nýir samningar við einkarekna sjúkrahúsið Klíníkina um að reka legudeild við einkasjúkrahúsið. Þetta segir Óttarr Proppé heil­brigðis­ráðherra. Þeir samningar sem nú eru í gildi munu gilda áfram.

„Ég mun ekki styðja uppbyggingu á einkareknum sjúkrahúsum með heildstæðri þjónustu sem eru rekin í gróðaskyni. Það er andstætt tilfinningu okkar allflestra ef ekki allra Íslendinga þegar kemur að almennri heilbrigðisþjónustu,“ sagði heilbrigðisráðherra á Alþingi í gær. Tilefnið var fyrirspurn Kolbeins Óttarssonar Proppé, þingmanns VG, um samninga við Klín­íkina í Ármúla.

Sagði Óttarr rammasamninga Læknafélags Reykjavíkur við Klín­íkina nákvæma og að rekstur margra daga legudeilda heyrði ekki undir samningana og þyrfti sérstaka samninga þar um. Hann myndi ekki sjá til þess að nýir samningar yrðu gerðir um þannig starfsemi.

„Ég sé ekki að það yrði til heilla að dreifa kröftum heilbrigðiskerfisins með því að fela í auknum mæli flóknari og meiri sjúkrahúsþjónustu aðilum annars staðar en á þeim sjúkrahúsum og spítölum sem fyrir eru,“ bætti ráðherra við.

Forsvarsmenn Landspítala hafa gagnrýnt að Klíníkin ætli að reka legudeild. Landlæknir hefur einnig talið að þarna sé um sjúkrahúsþjónustu að ræða sem eigi aðeins heima á Landspítalanum.

Kolbeinn Proppé telur það mikil pólitísk tíðindi og vatnaskil að ráðherra skuli ekki ætla að heimila Sjúkratryggingum Íslands að gera samninga við einkarekið sjúkrahús. 

„Ráðherra var býsna skýr með það að hann muni ekki gera sérstaka samninga um legu á sjúkradeildum í einkarekstri. Eftir stendur hins vegar hvort starfsemi Klíníkurinnar rúmast innan rammasamnings við Læknafélagið sem nú er í gildi. Þýðir þetta að ríkt fólk geti keypt sér aðgerð sem almenningur hefur ekki ráð á?“ spyr Kolbeinn.

Þingmaðurinn sagði einkarekstur í heilbrigðiskerfinu snúast um hugmyndafræði, „ekki tæknilegar útfærslur“.

Fréttin birtist fyrst í Fréttablaðinu