Augljóst að heiðursverðlaunin yrðu nefnd eftir Dorrit Moussaieff

Ný heiðursverðlaun RFF verða afhent á hátíðinni í ár og hafa þau verið nefnd eftir Dorrit Moussaieff. Ekki kom til greina að nefna verðlaunin eftir einhverjum öðrum en Dorrit að sögn Kolfinnu Vonar Arnardóttur, framkvæmdastjóra Reykjavík Fashion Festival.

Við erum að blása nýju lífi í RFF með þessum heiðursverðlaunum,“ segir Kolfinna Von um ný heiðursverðlaun hátíðarinnar sem nefnd hafa verið eftir fyrrverandi forsetafrú Íslands, Dorrit Moussaieff. „Okkur fannst mikilvægt að bæta einhverju við hátíðina, einhverju sem heiðrar afrek í íslenskri tísku. Og þess vegna bættum við þessum verðlaunagrip við,“ útskýrir Kolfinna. „Planið er að heiðra þær manneskjur sem hafa hvað mest sett mark sitt á íslenska tísku.“

Kolfinna segir íslenska fatahönnuði standa í mikilli þakkarskuld við Dorrit enda hefur hún kynnt íslenska hönnun af fullum krafti í gegnum tíðina. „Við vildum vísa í Dorrit með gripnum því okkur finnst hún hafa verið einn sterkasti fulltrúi og tengiliður Íslands við umheiminn í tískulega samhengi. Hún hefur sýnt íslenskum hönnuðum alveg rosalega mikinn áhuga og fyrir það viljum við þakka henni. Það var þess vegna sem við ákváðum að nefna verðlaunin eftir henni.“

Kolfinna segir ekki hafa komið til greina að nefna verðlaunin eftir einhverjum öðrum en Dorrit. „Nei, það var bara Dorrit, númer eitt, tvö og sautján,“ segir Kolfinna og hlær. Að sögn Kolfinnu voru verðlaunin og heildarhugmyndin í kringum þau unnin í nánu samstarfi við Dorrit. „Hún fékk að fylgjast með ferlinu og það var hún sem valdi hönnuð úr nokkrum tillögum til að smíða verðlaunagripinn. Og hún valdi Jóa og við vorum mjög glöð með það,“ segir Kolfinna.

Þess má geta að verðlaunagripinn hannaði gullsmiðurinn og skartgripahönnuðurinn Jóhannes Ottósson. „Jói hjá NOX, sem er formlegur bakhjarl hátíðarinnar í ár, bjó til gripinn sem er með skemmtilega vísun í Ísland." Kolfinna segir Dorrit vera hæstánægða með að verðlaunin séu nefnd eftir sér. „Já, hún sér þetta sem jákvæðan hlut, að fá að vera partur af þessu.“

Fyrstu heiðursverðlaunin verða afhent við hátíðlega athöfn í opnunarhófi RFF 23. mars. „Svo munum við veita þessi verðlaun annað hvert ár en ekki árlega. Við viljum nefnilega að þessi verðlaun séu alveg algjörlega einstök. Það tekur tíma að vinna verðlaunagripinn og það tekur tíma að meta hverjir eiga að hljóta hann.“

Kolfinna segir undirbúning hátíðarinnar í ár hafa gengið eins og í sögu og margt fólk úr tískubransanum hefur sýnt hátíðinni áhuga. „Fólk kemur úr öllum áttum og hefur aðstoðað okkur. Við fengum meira að segja heimsókn frá Tom Florio, sem starfaði lengi hjá Vogue. Hann mætti bara upp á skrifstofu RFF, hann vildi bara heyra hvernig við erum að byggja þetta upp því honum finnst þetta áhugavert. Hann er stór í bransanum og það er rosalega dýrmætt að hann sýni hátíðinni áhuga. Að svona maður skuli koma niður í Skútuvog til okkar er rosalega skemmtilegt,“ segir Kolfinna og hlær. „Hann veitti okkur mikilvæga ráðgjöf líka.“ Hátíðin hefur verið haldin á hverju árið síðan árið 2009, að undanskildu árinu 2016 þegar eigendaskipti urðu á henni.

„Það eru ekki mörg af tækifæri fyrir íslenska fatahönnuði til að koma sér á framfæri á alþjóðlegum markaði þannig að við fundum fyrir miklum meðbyr þegar við fórum aftur af stað með hátíðina. Við erum rosalega sátt við hvað fólk hefur hjálpað okkur við að framkvæma hlutina,“ segir Kolfinna.