Frumvarp Pírata um kjararáð ekki á dagskrá Alþingis í bili

Tillaga Pírata um að dagskrá þingfundar yrði breytt í dag svo taka mætti frumvarp þeirra um kjararáð fyrir var felld við upphaf fundarins í dag. Frumvarpið snýr að því að kjararáð kveði upp nýjan úrskurð sem feli í sér launalækkun til þingmanna en ákvörðunin skal ekki taka gildi eigi síðar en 28. febrúar næstkomandi þar sem kjarasamningar koma þá til almennrar endurskoðunar.

Jón Þór Ólafsson, þingmaður Pírata, bar tillöguna upp en þingflokkar Vinstri grænna og Samfylkingarinnar studdu að gerð yrði þessi breyting á dagskrá þingfundarins. Þingflokkar Viðreisnar, Framsóknarflokks og Sjálfstæðisflokks studdu tillöguna hins vegar ekki.

Birgir Ármannsson, þingflokksformaður Sjálfstæðismanna, kom í pontu og gerði athugasemd við það að Píratar hafi komið fram með dagskrártillöguna við lok þingfundar í gær en ekki sett hana fram á fundi þingflokksformanna eða á fundi forsætisnefndar.

Sigurður Ingi Jóhannsson, formaður Framsóknarflokksins, sagði að formenn allra flokka, þar á meðal Pírata, hefðu fjallað um það í desember hvernig taka ætti á „þessu kjararáðsmáli.“

Hann sagði formennina meðal annars hafa rætt það hvort hægt væri að fella úrskurði kjararáðs úr gildi en komust að þeirri niðurstöðu að það væri ekki hægt heldur yrði að fara þá leið sem gert var þar sem greiðslur til þingmanna voru lækkaðar um 150 þúsund.

„Mér finnst það tvískinnungsháttur ef við ætlum að fara að skipta hér um skoðun að taka þetta mál til umfjöllunar og tel eðlilegt að það komi í ljós nú þegar hvaða afstöðu til þessa máls með því að taka það annað hvort á dagskrá eða vísa því frá og við Framsóknarmenn leggjumst gegn því að málið verði tekið á dagskrá,“ sagði Sigurður Ingi.

Tillaga Pírata var því felld með 37 atkvæðum gegn 18.