Nokkuð góð byrjun í tónleikahaldi

„Slysavarnafélagið Landsbjörg er búið að vera svo öflugt í vetur, það eru öll þessi stóru mál sem maður hefur tekið svo persónulega – það er náttúrulega hvarf Birnu og síðan strax á eftir var snjóflóðið í Esjunni. Það kom mér í raun á skrið,“ segir Sigurdís Sóley Lýðsdóttir, 27 ára stuðningsfulltrúi, sem ákvað upp á sitt eindæmi að halda tónleika til styrktar Slysavarnarfélaginu Landsbjörgu.

Og þvílík byrjun hjá Sigurdísi í tónleikahaldi – tónleikarnir fara fram í Eldborgarsal Hörpunnar og fram koma Jón Jónsson, Páll Óskar Hjálmtýsson, Stefán Hilmarsson, Eyþór Ingi, María Ólafsdóttir, Friðrik Dór, Jóhanna Guðrún, Haukur Heiðar og Ragnar Bjarnason. Auk þess mun forseti Íslands flytja stutta tölu í upphafi tónleikanna. Kynnar verða Sigurdís og Eva Ruza Miljevic, en Eva mun hita upp fyrir tónleikana á Snapchat-reikningi sínum, evaruza.

Hvernig fórstu að því að fá listamennina og forsetann sjálfan til að mæta?

„Það var algjört leyndarmál hjá mér einni, ég byrjaði bara að senda skilaboð á Facebook á tónlistarfólk til að skoða viðbrögðin og sendi líka skilaboð á Guðna forseta. Ég fékk bara svo jákvæð viðbrögð frá öllum. Guðni vildi endilega fá að fylgjast með framvindu mála og hvernig þetta gengi, honum fannst þetta frábært framtak, sem peppaði mig alveg enn þá meira. Síðan fékk ég ráðleggingar frá Ingu á NASA og ég fór eftir ráðum hennar hvernig ég gæti staðfest listamenn og nálgast þá betur. Svo hafði ég samband við Hörpu og þau voru jákvæð strax frá byrjun og vildu endilega gera eitthvað til þess að hjálpa þannig að þau gáfu eftir leigu af Eldborgarsalnum og tækjabúnaði. Allir sem koma að þessu, bæði tónlistarfólk og ég erum að gefa vinnu okkar.“

Á síðu viðburðarins á Facebook mun ljósmyndarinn Sigurður Ólafur Sigurðsson birta ljósmyndir frá starfi Landsbjargar ásamt skýringum við þær, en hann er sjálfboðaliði hjá Landsbjörg og tekur hreint magnaðar myndir af vinnu björgunarsveitarinnar.

„Mér finnst persónulega myndirnar hjálpa fólki við að fá innsýn inn í störf Landsbjargar sem ég sé betur og skýrar núna eftir þetta starf mitt,“ segir Sigurdís. Aðspurð hvort hún leggi mögulega tónleikahald fyrir sig eftir þetta ævintýri svarar hún því að það sé aldrei að vita, „en ég er alveg búin að sjá að þetta er ótrúleg vinna,“ segir Sigurdís og hlær.

Tónleikarnir fara fram í Eldborgarsal Hörpunnar 1. mars. Miðaverð er 6.500 krónur og má nálgast miða á harpa.is. Fyrirtækjum er bent á að hafa samband við miðasölu Hörpunnar til að fá nánari upplýsingar um sérstaka styrktarpakka sem þeim standa til boða.