Valsmenn fóru áfram á fleiri útivallarmörkum

Valsmenn eru komnir áfram í 3. umferð Áskorendabikars Evrópu í handbolta eftir 24-24 jafntefli við RK Partizan 1949 í seinni leik liðanna í Svartfjallalandi í dag.

Fyrri leiknum í gær, sem taldist heimaleikur Vals, lyktaði með 21-21 jafntefli og Valsmenn fóru því áfram á fleiri mörkum skoruðum á útivelli.

Valsmenn virtust vera búnir að klúðra sínum málum en þeir fengu á sig tvö mörk einum fleiri undir lokin.

Svartfellingarnir komust í 23-21 en Valur svaraði með þremur mörkum í röð.

Heimamenn skoruðu síðasta mark leiksins en það breytti engu. Lokatölur 24-24 og Valsmenn eru komnir áfram.

Mörk Vals:

Anton Rúnarsson 5, Vignir Stefánsson 5, Ólafur Ægir Ólafsson 4, Josip Juric Grgic 3, Sveinn Aron Sveinsson 3, Orri Freyr Gíslason 2, Ýmir Örn Gíslason 1, Hlynur Morthens 1.