Dómsmorð í Hæstarétti?

Nýlega kom bókin Með lognið í fangið – um afglöp Hæstaréttar eftir hrun.

Ég hef reynt að lesa allt sem Jón Steinar Gunnlaugsson hrl. skrifar um dómsmál og lögfræði.

Hann skrifar mjög læsilegan texta en umfram allt virðist hann hafa brennandi áhuga á réttlætinu.

Það er ekki lítils um vert.

Í kynningu útgefanda er innihaldinu svo lýst:

Bókin er hrollvekja.

Eða ætti í það minnsta að vera það fyrir alla sem telja einhvers um vert að búa í réttarríki.

Jón Steinar starfaði í átta ár sem dómari við Hæstarétt.

Hann setur fram alvarlegar ásakanir á hendur dómurum við réttinn; að þeir fari á skjön við lög og rétt í dómum sínum.

Jón Steinar sakar þá um klíkuskap, að láta persónulega óvild stjórna niðurstöðum sínum, persónulega hefnd og að láta sig augljóst vanhæfi litlu skipta.

Mesta athygli hafa þau ummæli vakið sem Jón Steinar viðhafði um dóminn yfir Baldri Guðlaugssyni ráðuneytissjóra fjármálaráððuneytis, sem var dæmdur til fangelsisvistar fyrir innherjasvik í tengslum við Landsbankann.

Telur Jón Steinar að í því máli hafi verið framið dómsmorð, enda hafi Baldur verið dæmdur fyrir háttsemi sem hann var ekki ákærður fyrir.

Sérstaka þykkju fyrir ummælin hefur Benedikt Bogason tekið upp og látið stefna Jóni í meiðyrðamáli.

Þetta verða áhugaverð réttarhöld á báðum dómsstigum og titringur í lofti vegna ruðningsáhrifanna.

Á fundi lögmannafélagsins 24. nóv. sl. taldi formaður þess Jón Steinar hafa brotið siðareglur með afskiptum af máli Baldurs. Gott er nú til þess að vita að lögmenn vilja virða siðareglur.

Landsbankinn hefur siðareglur á heimasíðu sinni. Ég hef áður lýst deilum mínum við bankann á síðum Stundarinnar.

Þeim er best lýst sem svikamyllu LÍ, þar sem allar siðareglur eru brotnar.

Héraðsdómarinn, sem sýknaði mig í máli þessu, tekur fram í dómsorði að ég hafi orðið fyrir óheiðarlegum vinnubrögðum að hálfu bankans.

Ætla mætti að hæstaréttardómarinn Benedikt Bogason hefði þurft órækar sannanir frá hálfu lögmanns bankans fyrir sekt minni því allir skulu teljast saklausir uns sekt er sönnuð, segja lögin.

Sama dag og BB sneri sýknudómi mínum við voru tveir þekktir misyndismenn sýknaðir af meintu morði á samfanga innan veggja Litla-hrauns vegna vafans á því að hnjaskið sem þeir voru ábyrgir fyrir hafi valdið dauða mannsins.

Af hverju naut ég ekki sömu meðferðar, því skv. 65. grein stjórnarskrárinnar skulu allir jafnir fyrir lögum?

Ég tel þvi að Benedikt Bogason hafi misbeitt valdi sínu og tek undir með Jóni Steinari, svona eru réttarmorð framin.

Kveðja,

Einar Valur Ingimundarson