Dauðir mánuðir í kvikmyndahúsum

Janúar og febrúar eru oft kallaðir „dump months“ eða ruslmánuðirnir í kvikmyndabransanum því að myndir sem koma út í þessum mánuðum eiga oftast litla möguleika á því að fá mikla aðsókn. Hollywood-stúdíóin „henda ruslinu“ í þessa mánuði – þeim myndum sem þau búast ekki við að skili miklum peningum er oft „dömpað“ hingað. Þetta stafar einfaldlega af því að mánuðurinn á undan er að sjálfsögðu desember, en það er einn vinsælasti kvikmyndamánuður ársins. En það eru þó fleiri ástæður fyrir þessu. Til að mynda er fólk yfirleitt með minna fé milli handanna eftir sturlaða eyðslu jólanna, veðrið er oft á tíðum verra og allar Óskarsbeiturnar verða að koma út seinnipart árs svo að gamla fólkið sem sér um að tilnefna þær til verðlaunanna muni nú eftir þeim.

Þessu hefur þó ekki alltaf verið háttað svona. Í bernsku kvikmyndanna voru til að mynda margar góðar myndir gefnar út í janúar – nokkrar klassískar Charlie Chaplin myndir eins og The Kid og The Circus komu út í þessum óvinsæla mánuði og síðar meir, á fimmta áratugnum komu út myndir eins og The Grapes of Wrath, Sullivan’s Travels, Shadow of a Doubt og The Treasure of the Sierra Madre en allar eru þær óneitanlega nokkrar af bestu myndum allra tíma.

Oftast eru það þó arfaslakar myndir sem koma út á þessum tíma. Stúdíóin hafa verið dugleg við að henda slöppum bitlausum gamanmyndum á þessa mánuði. Hver man til dæmis ekki eftir hinni sprenghlægilegu mynd Hotel for Dogs með Don Cheadle? Enginn? Það er líka vinsælt að færa spennumyndir þangað – The Green Hornet stefndi í að fá dræmar viðtökur svo hún var færð frá júní til janúar. Endurgerðum af frægum myndum er oft „dömpað“ á þessum tíma, Disney hefur til dæmis nýtt sér það til að gefa út endurgerðir af Lion King og Beauty and the Beast, og Star Wars-myndirnar hafa líka verið endurútgefnar í febrúar. Svo eru það unglingamyndirnar og rómantísku gamanmyndirnar – þær eru oft settar í sýningar í janúar og febrúar, því að unglingar skella sér mikið í bíó á þessum tíma og í febrúar er Valentínusardagurinn. Hin ótrúlega skelfilega Fifty Shades of Frey kom til að mynda út á þessum tíma.

Þannig að það gæti orðið svolítil bið í að næsta bomba komi í kvikmyndahúsin, en þangað til er til dæmis hægt að rifja upp hina bráðskemmtilegu kvikmynd Pauls Blart: Mall Cop með Kevin James, en það stórvirki kvikmyndasögunnar kom einmitt upphaflega inn í líf okkar í janúar.