Róbert í liði umferðarinnar

Róbert Gunnarsson var valinn í lið 24. umferðar í dönsku úrvalsdeildinni í handbolta.

Þetta er í annað sinn sem Róbert er valinn í lið umferðarinnar í vetur. Hann var einnig valinn í lið 9. umferðar dönsku deildarinnar.

Róbert átti góðan leik þegar Århus bar sigurorð af Midtjylland, 26-21, á sunnudaginn var.

Línumaðurinn öflugi skoraði fimm mörk úr jafn mörgum skotum í leiknum og fiskaði tvö vítaköst.

Róbert sneri aftur til Århus fyrir þetta tímabil en hann lék áður með liðinu á árunum 2002-05 og er í miklum metum hjá stuðningsmönnum þess.

Róbert, sem lagði landsliðsskóna á hilluna í lok síðasta árs, hefur skorað 66 mörk í 24 deildarleikjum í vetur.

Rundens hold #888ligaen – 24. Spillerunde. #herreligaen #rundenshold #tophåndbold pic.twitter.com/XJFMf0WjUJ

— Tophaandbold.dk (@tophaandbold) March 21, 2017