Jólaljósin lýsa upp skammdegið: „Af hverju ekki?“

Rúmlega tveir mánuðir eru nú til jóla en þrátt fyrir það má á stöku stað sjá jólaljós komin upp. Þeir sem hafa tekið forskot á sæluna hugsa þó meira um birtuna frá perunum heldur en skreytingar á þessum tímapunkti.

„Ég er með smá ljós í gluggunum og aðeins úti á palli. Þetta eru mest megnis hvítar perur sem ég set upp þegar dimma tekur,“ segir Hjördís Guðmundsdóttir, íbúi í Flétturima í Grafarvogi, við Vísi.

Hún kallar ljósin að eigin sögn haustljós. Í seríunum eru hvítar perur en Hjördís setur þær út í glugga þegar daginn tekur að stytta. Skömmu eftir að nóvember gengur í garð eru þær fjarlægðar úr gluggunum og rauðar jólaseríur settar í staðinn.

„Ég hugsa bara, í mesta skammdeginu, af hverju ekki? Af hverju ekki að láta birtuna njóta sín og hafa bjart í kringum sig?“ segir Hjördís.

„Nágrannar mínir í næsta húsi grínuðust með það hvort það yrði ekki örugglega dimmer á þessu svo þeir gætu horft á sjónvarpið,“ segir Ómar R. Valdimarsson héraðsdómslögmaður. Skrautið er einnig komið á húsið hans. 

„Undanfarin ár hef ég verið í grimmri samkeppni við IKEA um það hvort seríurnar mínar fara upp á undan skrautinu þeirra og sjálfri jólageitinni. Í ár voru þeir örlítið á undan,“ segir Ómar.

Skrautið á Ómar ekki sjálfur en hann í félagi við annan mann rekur fyrirtækið Garðlist. Á sumrin sér það um garðslátt og garðahreinsun en á öðrum árstímum um skreytingar á görðum og jólaskreytingar. Ljósin eru þaðan komin. 

„Ég hef fundið það að myrkrið fer alltaf ver í mann eftir því sem maður eldist og því fer þetta upp svona snemma. Skrautið fær síðan að lifa fram í janúar þegar daginn tekur að lengja á ný.“

Í fyrstu skiptin sem Ómar og fjölskylda hans gerði þetta bjó hann í Hlíðunum og perurnar voru eldri týpur. Þá tók hann eftir eilítilli hækkun á rafmagnsreikningum. Nú eru hins vegar LED-perur í seríunum auk þess að skreytingin er tímastillt á þann hátt að það kviknar á henni þegar rökkvar. 

„Jólin eru eiginlega allt í kringum mig. Konan mín, Margrét Ýr, er mikið jólabarn og í raun getin af tveimur jólabörnum,“ segir Ómar. Það vill nefnilega svo til að báðir tengdaforeldrar hans eru fæddir á aðfangadag. „Síðan er eldri bróðir minn fæddur á þeim degi líka.“