Holland skaust í toppsætið

Holland er komið í toppsætið í milliriðli I á EM kvenna í handbolta eftir öruggan sigur, 35-27, gegn Serbum í kvöld.

Holland er með sex stig en Þýskaland fimm. Frakkar geta komist upp að hlið Hollands á eftir takist liðinu að skella Svíum á eftir. Serbía er í næstneðsta sæti riðilsins.

Holland var með yfirburði gegn Serbum í dag og leiddi í hálfleik, 17-12. Hollensku stúlkurnar gáfu svo ekkert eftir í síðari hálfleik.

Lois Abbingh og Yvette Broch voru atkvæðamestar í liði Hollands með sex mörk. Jovana Stoiljkovic skoraði átta mörk fyrir Serba.