Yfir fimmtíu manns leitað til Stígamóta í vikunni

Fimmtíu manns hafa leitað til Stígamóta síðustu vikuna til að leita sér aðstoðar. Talskona Stígamóta segir söfnunarátak þeirra hafa vakið mikla athygli og fleiri því leitað til samtakanna. Yfir sextíu milljónir söfnuðust í átakinu og um fimm hundruð mánaðarlega styrktaraðilar urðu til.

Stígamót eru grasrótarsamtök sem berjast gegn kynferðisofbeldi og veita fólki aðstoð sem hefur verið beitt kynferðisofbeldi. Undanfarið hafa þau staðið fyrir söfnunarátaki. Markmiðið er að safna mánaðarlegum styrktaraðilum að rekstri Stígamóta. Hápunktur átaksins var í gærkvöldi þegar sérstakur söfnunarþáttur var sýndur í beinni útsendingu á Stöð 2.

Guðrún Jónsdóttir talskona Stígamóta er ánægð með hversu margir voru tilbúnir að styðja við samtökin. Söfnunin fór þó hægt af stað. „Svo spítti fólk í lófanna og þegar útsendingu lauk þá var enn að bætast við stuðningsfólk. Seinast þegar að ég vissi þá voru komnir um 550 nýir stuðningsaðilar sem ætla að tryggja okkur reksturinn næstu mánuði og ár,“ segir Guðrún.

Þá segir hún að yfir sextíu milljónir hafi safnast. „Við erum ákaflega ánægð með þennan árangur og hlökkum til að bretta upp ermar og nýta þennan stuðning til þess að bæta þjónustuna okkar,“ segir Guðrún.

Guðrún segir átak sem þetta skila miklum árangri þegar kemur að því að vekja athygli á starfi samtakanna. „Það varð ansi mikil vitundarvakning og sprenging eiginlega í hérna aðsókn hjá okkur þannig að það komu inn nýir aðilar á þessari viku sem óskuðu eftir að vinna með sjálfan sig á Stígamótum og það er nú ekki síður mikilvægt,“ segir Guðrún Jónsdóttir