„Á negri að vera andlit Íslands út á við?“

Sema Erla Serdar, formaður framkvæmdarstjórnar Samfylkingarinnar heldur áfram baráttu sinni gegn rasisma á Íslandi með færslum sínum á Facebook.

Í gær deildi hún meðal annars skjáskotum af tveimur einstaklingum sem höfðu tjáð andúð sína á því að Unnsteinn Manúel Stefánsson hafi verið fenginn til þess að kynna niðurstöðu dómnefndar í Eurovision keppninni á laugardag.

Þar ritar annar þeirra meðal annars; „What. Á negri að vera andlit Íslands út á við? Svona svipað og Íslendingur væri andlit Kína út á við. [...] Ætti að skipta þessum kynnir út fyrir Íslending.“

Því næst birtir hún skjáskot sem tekin er af ummæla kerfi Vísis. Þar tjáir annar netverji sig um valið á Unnstein með orðunum; „hvernig í helvíti er svartur maður að tala fyrir Ísland?“.

Er fólk að sigla undir fölsku flaggi?

„Mér finnst það vera að aukast að fólk tjái rasískar skoðanir sínar undir nafni á Facebook,“ segir Sema sem veltir því þó fyrir sér hvort þarna séu aðilar á ferð með tilbúna Facebook reikninga á ferð. „Nettröllunum fækkar og fólk er að koma í miklu meira mæli fram undir réttu nafni. Með mynd af barnabörnunum í prófíl undir einhverjum ógeðslegum hatursáróðri.“

Fyrr á þessu ári birti Sema færslur sem sýndu persónuárásir í hennar garð vegna ummæla hennar um fjölmenningu á Íslandi. Síðan þá hefur hún deilt nokkrum færslum þar sem hún bendir á rasisma á Íslandi.

Hún er því að verða eins konar rasisma-lögga Íslands á netinu. Svo mikil eru áhrif hennar að fólk er byrjað að hafa samband við hana að fyrra bragði sjái það vott um rasisma í samfélaginu. „Það er nú með því betra sem ég hef verið kölluð. Þetta vinnst í sameiningu og við þurfum að standa saman á vaktinni.“

Í sömu færslu birti hún einnig myndir af límmiðum sem hefur verið komið fyrir á strætóskýlum, inn á almennings salernum og fleira sem sýna beinan hatursáróður gegn blökkufólki.

Ættum ekki að eyða of miklu púðri í rasísk ummæli

Unnsteinn Manuel Stefánsson vill ekkert tjá sig um fólkið sem hér um ræðir þar sem það dæmi sig sjálft með orðum sínum. Hann segist líka vera lítið hrifinn af því að aðrir séu að deila skjáskotum og öðru af rasískum ummælum á Facebook, hvort sem það er í garð hans eða annarra.

„Þegar fólk gerir svona þá eru mjög margir krakkar um allt land sem þurfa enn og aftur að fara efast um tilverurétt sinn. Þegar fólk sér að það er til fólk sem hugsar svona hérna þá verður áreitið bara enn meira fyrir vikið. Þetta er svo lítill hluti af stóra samhenginu því það er lítið um kynþáttafordóma á Íslandi. Ég skil alveg að það skapist umræða og fólk fái sjokk þegar fólk póstar svona en við ættum ekki að vera eyða of miklu púðri í það, ekkert frekar en að við eigum að vera tala of mikið um hugmyndir Breivik. Það er ekki það að ég sé að mæla með þöggun heldur liggur baráttan annars staðar. Til dæmis í umræðunni um Islam þá eru ansi margir sem þyrftu að hugsa sinn gang."

Það kann að vera að Unnsteinn hafi lög að mæla því vissulega skapaðist meiri umræða um hundinn Lunu á netinu eftir framkomu hans á laugardag en eitthvað annað.

„Hugmyndin kom frá stóra bróður mínum. Ég átti að senda þeim hjá RÚV fyrir löngu hvað ég ætlaði að segja. Mér datt ekkert fyndið í hug. Logi litli bróðir sagði mér að ef mér dytti ekkert fyndið í hug ætti ég ekki að vera reyna það. Ég vissi vel að öllum myndi finnast Lunu yndisleg sem var raunin.“