Andrúmsloft Stone Roses tónleika selt á 12 milljónir króna

Krukka sem inniheldur loft af tónleikum bresku hljómsveitarinnar The Stone Roses virðist ætla að selja fyrir tæpar 12 milljónir króna.

Sniðugur aðdáandi tók mynd af krukku sem hann var við að loka á tónleikum sveitarinnar í Manchester Etihad Stadium laugardaginn 18. Júní 2016. Eftir tónleikana setti hann upp myndina á eBay. Þar sagði hann að inn í krukkunni væri „andrúmsloftið af tónleikunum fangað að eilífu þar sem 60 þúsund aðdáendur sungu með“ og setti krukkuna á sölu.

Endurvarp af gítarsólói John Squire

„Ég sver að ef þú setur eyrað upp við krukkuna þá má heyra endurvarp af gítarsólói John Squire,“ segir hann í gríni.

Eftir þriggja daga uppboð hafa 90 manns boðið í krukkuna. Hæsta tilboðið er komið upp í tæp 66 þúsund pund. Býður einhver betur?

Hér fyrir neðan má sjá stemninguna af tónleikum sem haldnir voru á sama stað, daginn áður en loftið úr krukkunni var fangað.