Guðni Th. „airbrush“-aður

Dru Blair, færasti úðteiknari eða „airbrush“-ari heims, er staddur hér á landi og vinnur nú að verki að forsetaframbjóðandanum Guðna Th. Verkið er ekki tilbúið en Vísir hefur fengið sendar myndir af verkinu í mótun.

Miðað við önnur verk Dru Blair þá má búast við því að lokaniðurstaðan verði þannig að nær ógerningur verði að greina á milli þess og ljósmyndar.

„Það var ég sem ákvað það. Guðni er með mikið fylgi og ekki ómyndarlegur maðurinn,“ segir Ýrr Valkyrja Baldursdóttir sem flutti bandaríska listamanninn inn. „Það er líka mikil áskorun að teikna Guðna með þessum hætti. Hann er svipsterkur og það er erfitt að gera broddaskegg og lítið hár.“

Námskeiðið gekk vel

Dru kom hingað til lands til þess að kenna úðteiknun en í síðustu viku fór fram námskeið sem margir sóttu.

„Verkin sem nemendur fóru út með voru alveg mögnuð. Þetta gekk framar vonum og hann ætlar að koma aftur að ári liðnu og það eru þegar fjórir búnir að skrá sig á það námskeið.“