Húsvörður 365 lendir í átökum við innbrotsþjófa

„Einhvern tíma hefði ég nú slegist við þá. En ég vildi ekki meiða þá,“ segir Viktor Jónsson húsvörður hjá 365.

Viktor lenti í átökum við tvo innbrotsþjófa í morgun, skömmu fyrir klukkan sex. Þeir höfðu laumast inn í húsakynni 365, í kjölfar ræstingatæknis en urðu hins vegar fyrir því óláni að Viktor var á staðnum, eins og jafnan í bítið. Viktor kallar ekki allt ömmu sína eins og starfsmenn 365 þekkja mæta vel.

„Ég hringdi strax í lögregluna þegar ég sá þá,“ segir Viktor. Hann var með kerru sína að fara með rusl í gám. Innbrotsþjófarnir höfðu komist í afgreiðslu fyrirtækisins, voru búnir að rífa úr sambandi tvær tölvur og vildu hafa þær á brott með sér. En, lentu þá í því að kunna ekki vel á útgönguleiðina, yfirsást hnappur sem opnar útidyrnar. Þeir reyndu því að spenna hurðina upp. Það bætti svo ekki stöðu þeirra að Viktor hindraði jafnframt útgöngu þeirra með kerru sinni. Grjótharður í horn að taka.

„Þetta var eiginlega meira útbrot en innbrot,“ segir Viktor – sem lætur sér hvergi bregða. Innbrotsþjófarnir tveir komust þó út við illan leik og í bíl sinn. En, þá tók ekki betra við, því Viktor veitti þeim eftirför, reif upp grófa möl sem varð á vegi hans í blómabeði og grýtti á eftir bílnum með þeim afleiðingum að afturrúða þjófanna sprakk.

Viktor, sem náði niður bílnúmerinu, segir svo frá að þetta hafi nú ekki verið fagmannlega að verki staðið hjá þeim kónum, eiginlega bara alls ekki því eftirlitsmyndavélar eru við húsið en þeir höfðu ekki neina tilburði í þá átt að forðast þær. Og náðust góðar myndir af mönnunum. „Þegar rannsóknarlögreglan kom og leit á myndbandstökurnar, þá sögðu þeir strax: Jájá, við vitum alveg hverjir þetta eru.“

Aðspurður segist Viktor ekki vita hvort mennirnir voru undir áhrifum lyfja. „Ég þekki það ekki svo vel.“