Mikill viðbúnaður hjá gæslunni vegna togara sem „týndist“

Mikill viðbúnaður var hjá Landhelgisgæslunni fyrr í morgun þegar togari datt út úr ferilvöktun djúpt norður af landinu. Í tilkynningu frá gæslunni kemur fram að þá þegar hafi verið farið í frekari eftirgrennslan eftir togaranum en tilraunir til þess að ná sambandi við hann í gegnum millibylgju og gervihnattasíma báru ekki árangur.

Stjórnstöð Landhelgisgæslunnar óskaði því eftir því að nærstödd skip, sem voru í um 40 sjómílna fjarlægð, myndu einnig reyna að ná sambandi við togarann en það bar heldur ekki árangur. Því var þyrla Landhelgisgæslunnar, TF-LIF, kölluð út sem og björgunarskip Slysavarnafélagsins Landsbjargar á Siglufirði.

Varðskipinu Tý var einnig gert viðvart og beðið um að halda á staðinn en Týr var staddur á Vestfjörðum. Að auki voru nærstödd skip beðin um að gera sig klár í að halda í átt að togaranum.

Um klukkan 11:40 tókst stjórnstöð Landhelgisgæslunnar svo að ná sambandi við togarann og reyndist allt vera í lagi um borð þrátt fyrir að ekki hafi tekist að ná sambandi fyrr. Var þá allur viðbúnaður gæslunnar afturkallaður.