Stjórn ferðamála hefur þrisvar komið saman

Stjórn Stjórnstöðvar ferðamála hefur aðeins komið þrisvar saman frá því að Stjórnstöðin var sett á laggirnar þann 1. nóvember á síðasta ári. Þegar stjórnstöðin var sett á fót sagði ráðherra ferðamála mikið vera undir þar sem í ferðaþjónustu og uppbyggingu hennar fælust mikil sóknarfæri til aukinnar hagsældar samfélagsins.

Stjórn Stjórnstöðvar ferðamála er samansett af ráðherrum, fulltrúum ferðaþjónustunnar og fullrúum Sambands íslenskra sveitarfélaga. Hún kom tvisvar saman í nóvembermánuði og einu sinni í byrjun marsmánaðar. Stjórnstöð ferðamála fær 65 milljónir frá hinu opinbera til rekstursins. Tveir starfsmenn eru starfandi hjá Stjórnstöðinni sem stendur.

Örir fundir óþarfir að mati forstöðumanns

Hörður Þórhallsson, framkvæmdastjóri Stjórnstöðvar ferðamála, segist ekki geta veitt aðgang að fundargerðum Stjórnstöðvarinnar og bendir á Ragnheiði Elínu Árnadóttur, iðnaðar- og viðskiptaráðherra, sem er formaður stjórnarinnar. „Verkefni Stjórnstöðvarinnar eru gríðarstór. Það er ekki eins og það komi inn ný verkefni í hverri viku. Ef vel gengur erum við að vinna verkefni í upp undir hálft ár,“ segir Hörður. „Það er því algjör óþarfi að halda öra fundi í stjórn Stjórnstöðvarinnar. Ég bað meira að segja um að sleppa einum fundi. Þegar á þarf að halda, þá eru fundir haldnir í stjórninni.“

Svar ráðuneytis Ragnheiðar við beiðni Fréttablaðsins um að fá aðgang að fundargerðum stjórnarinnar var að því væri hafnað. Voru svörin á þá leið að fundargerðir stjórnar væru vinnugögn og því undanþegin upplýsingarétti og leynd hvíldi yfir fundum stjórnarinnar.

Hörður var ráðinn sem verktaki til sex mánaða og rennur samningur hans út á næstu vikum. Hann sagði umræður um framtíð sína hjá Stjórnstöðinni vera hafnar milli hans og stjórnarinnar.