Landspítalinn vill orlofsíbúðir stéttarfélaganna fyrir veikt fólk utan af landi

Landspítalinn hefur formlega óskað eftir því við verkalýðsfélög um allt land að fá að nýta orlofsíbúðir félaganna í Reykjavík þegar þörf er á að vista þungaðar konur eða foreldra utan af landi vegna veikinda á meðgöngunni.

Drífa Snædal, framkvæmdastjóri Starfsgreinasambands Íslands, segir ófært að treyst sé á að stéttarfélögin bæti fyrir versnandi heilbrigðisþjónustu fyrir fólk utan höfuðborgarsvæðisins.

„Orlofsíbúðirnar hafa verið nýttar í þessum tilgangi og munu að sjálfsögðu verða nýttar í þetta áfram. Það sem hins vegar við viljum vekja athygli á er að það er síaukin krafa á stéttarfélagið að bæta fyrir síversnandi þjónustu fyrir fólk utan af landi,“ segir Drífa. Íbúðirnar séu hugsaðar sem orlofsíbúðir þeirra sem greiði í stéttarfélögin, ekki sem hluti af heilbrigðiskerfinu.

„Það hefur verið dregið úr heilbrigðisþjónustu úti á landi sem þýðir það að fólk þarf að eyða meiri tíma og meiri peningum í það að sækja sér þjónustu til höfuðborgarsvæðisins. Það er ófært að stéttarfélögum verði gert að liðka fyrir versnandi þjónustu, að taka á sig versnandi þjónustu við fólk utan höfuðborgarsvæðisins,“ segir hún.  

Drífa segir að hið opinbera eigi að sinna skyldum við fólk annars staðar af landinu og ekki treysta á sjóði sem félagsmenn stéttarfélaganna hafi byggt upp í áratugi. Það sé skýr krafa aðildarfélaga Starfsgreinasambandsins að tryggt verði jafnræði milli landsbyggðar og höfuðborgarsvæðis og sinni skyldum sínum gagnvart veiku fólki og þunguðum konum sem ekki geti sótt þjónustu í heimabyggð.

„Það eru orlofsíbúðir um allt land og það er mjög mikil ásókn í þær. Það er hægt að vera með 100 prósent nýtingu bara af fólki sem vill vera í fríum og orlofi. Þetta er hugsað til að bæta lífsgæði félaga. Félagar greiða í þessa sjóði í gegnum sína kjarasamninga, þetta er hluti af þeirra launum sem fara í þetta, og þannig er þetta hugsað og þannig á að nota þetta,“ segir Drífa Snædal.