Örmagnaðist eftir 10 daga bið á flugvelli í Kína eftir konu sem hann kynntist á netinu

Hollendingur á fimmtugsaldri er kominn í heimsfréttirnar fyrir að hafa ferðast um 4.500 kílómetra til að hitta konu sem hann hafði kynnst á netinu. Að sögn Alexander Pieter Cirk höfðu þau ákveðið að hittast á Changsha Huanghua-alþjóðaflugvellinum í Kína en þangað mætti konan aldrei. Eftir tíu daga bið á flugvellinum var Cirk fluttur örmagna á sjúkrahús.

Samkvæmt kínverska fjölmiðlinum CCTV News hafði maðurinn átt í samskiptum við konuna, sem fjölmiðlar ytra hafa nafngreint sem Zhang, í tvo mánuði áður en hann ákvað að heimsækja hana.

Fjölmiðlar í Kína höfðu samband við Zhang sem sagðist hafa haldið Cirk vera að grínast þegar hann sagðist ætla að heimsækja hana. Hún tók hann heldur ekki alvarlega þegar hann sendi henni mynd af flugmiðunum sínum til Kína.

„Við vorum orðin nokkuð náin en á seinni stigum fannst mér framkoma hans í minn garð vera orðin kaldlynd. Einn daginn sendi hann mér mynd af flugmiðunum en ég hélt að það væri eitthvað grín. Hann hafði síðan ekki samband við mig aftur,“ er haft eftir Zhang.

Fjölmiðlar virðast hafa gengið nokkuð hart að Zhang í þessu máli því þeir vildu fá að vita hvers vegna Cirk náði ekki í hana þegar hann var kominn til Kína. Sagðist Zhang hafa slökkt á símanum sínum á meðan hún gekkst undir og var að jafna sig eftir lýtaaðgerð í annarri kínverskri borg.

Cirk var útskrifaður af sjúkrahúsi í gær og sneri aftur til Hollands. Zhang heldur því fram við fjölmiðla ytra að sambandi þeirra sé alls ekki lokið því hún ætlar að heimsækja Cirk þegar hann hefur náð heilsu aftur.