Framsetningin skiptir jafn miklu máli og gjöfin

Hin sænska Linn­ea Ahle, bloggari og verslunareigandi, leggur mikla áherslu á fallega framsetningu þegar kemur að jólagjöfunum. Það er ekki bara innihald pakkanna sem gleður heldur líka útlit þeirra.

Linnea Ahle er mikill fagur­keri og hefur gaman af því að spekúlera í innpökkun. „Fyrir mér skiptir framsetningin, sem sagt innpökkunin, jafn miklu máli og gjöfin sjálf. Ég elska að gefa gjafir og að pakka þeim inn á fallegan hátt.“

Linnea kveðst vera með minímalískan stíl. „Ég er með týpískan skandinavískan og látlausan stíl. Ég veit alveg hvernig mig langar til að pakka inn gjöfunum löngu áður en ég byrja að pakka, þannig að þetta gengur hratt fyrir sig. 

Ég kaupi gjafapappír, borða og límmiða hér og þar og byrja snemma,“ segir Linnea sem notar gjafapappír frá merkinu Rifle Paper co. þetta árið, en sá pappír er einmitt seldur í verslun hennar. „Pappírinn er dökkblár og með blómamynstri.“

Linnea er mikið jólabarn og heldur upp á sænskar jólahefðir sem hún var alin upp við í bland við nýjar sem hún kynntist á Íslandi. „Mínar uppáhaldsjólahefðir eru þær sem ég ólst upp við. Þær eru mjög sænskar, eins og að baka „saffron buns“ og að setja upp jóladagatal. Og á aðfangadag horfum við á Andrés Önd, sama þáttinn á sama tíma. Þetta hef ég gert frá því í barnæsku.“

Linnea og fjölskylda skiptast á að halda jólin á Íslandi og í Svíþjóð. „Þannig fær dóttir okkar tækifæri til að kynnast jólahefðum frá báðum löndum,“ segir Linnea sem á þriggja og hálfs árs dóttur með manni sínum, svo eru tvíburar á leiðinni og þau ætla að passa upp á að öll börnin fái innsýn inn í bæði sænsk og íslensk jól.