Neyðast til að vera heima með fötluðum börnum

Þriggja mánaða sumarfrí er nú hafið hjá grunnskólabörnum og á mörgum heimilum er flókið púsluspil að finna úrræði fyrir börnin á meðan foreldrarnir eru enn að vinna, en fyrir foreldra fatlaðra barna getur það reynst ómögulegt.

Drífa Birgitta og Oddný Svava eiga báðar drengi sem vegna einhverfu og þroskahömlunar geta hvorki verið einir heima né sótt almenn leikjanámskeið.

Langar að vera á vinnumarkaði en getur ekki

„Staðan hjá mér er þannig að ég á rosalega erfitt með að fara í vinnu og vera á vinnumarkaðnum því að dagurinn sem skólanum lýkur þarf ég að vera heima,“ segir Drífa. Hún tekur fram að 11 ára sonur hennar fá frábæran stuðning frá sínu sveitarfélagi yfir veturinn, með sjúkraþjálfun og frístund, en um leið og skóla ljúki taki tómið við.

„Þannig að ég þarf að vera í þriggja mánaða sumarfríi alveg eins og grunnskólarnir eru því það er ekkert úrræði í boði fyrir hann. Mér finnst þetta sorglegt, það er ekkert rosalega langt síðan ég útskrifaðist úr háskóla og mig langar að vera á vinnnumarkaðnum en ég veit ekk hvernig ég á að fara af því."

Eldri systkinin skiptust á að passa hann síðustu sumur

Sonur Oddnýjar er 9 ára en hún segist í raun vera að upplifa vandann í fyrsta sinn núna því síðustu sumur gátu þau brúað bilið innan fjölskyldunnar.

„Hann á náttúrulega nokkur systkini og þau hafa skipt því sín á milli að vera heima með bróður sinn. Koma honum á eitt og eitt námskeið, fara með hann heim, fara með hann í sund og svona. En nú á ég það stálpuð börn að ég er í vandræðum. Þau eru farin á vinnumarkaðinn og ég þarf bara að vera heima með hann.“

Son hennar langar á fótbltanámskeið en til þess að geta það þyrfti hann að hafa manneskju með sér til stuðnings. „Maður bara stendur eiginlega úti í horni og veit ekki alveg hvernig maður á að, hvað maður á að gera. Ég fékk engar leiðbeiningar með honum. Það vantar.“

Mörg börn sem þurfa aðstoð

Þær segja hluta af vandanum þann að öll fötluð börn séu sett undir einn hatt án tillits til sérþarfa þeirra. „Kerfið er auðvitað allt af vilja gert en þaðer peningaskortu og fá úrræði, og það eru mörg börn í vanda og þurfa aðstoð,“ segir Drífa.

„Ég vildi óska þess að það kæmi úrræði með þessi börn þar sem þau gætu fengið, stuðning. Og ekki bara gæslu heldur líka eitthvað skemmtilegt, þannig að þetta sé ekki framlenging bara á skólanum.“