Framkvæmdastjóri Sólheima: „Tel mig vita að þeir sem hér búa, að þeim líður ágætlega“

„Í fyrsta lagi erum við enn í skýjunum eftir heimsókn forseta, þetta var stórkostlegur dagur, segir Guðmundur Ármann Pétursson, framkvæmdastjóri Sólheima, þegar hann er spurður út í orð Freyju Haraldsdóttur, varaþingmanns Bjartrar framtíðar, og Steinunnar Ásu Þorvaldsdóttur sjónvarpskonu um heimsókn forseta Íslands til Sólheima í gær.

Um var að ræða fyrstu opinberu heimsókn Guðna Th. Jóhannessonar í embætti forseta Íslands en Freyja sagði fólk í valdastöðu eiga að vinna gegn aðskilnaðarstefnu og útskúfun, ekki upphefja hana og mæra.

Steinunn Ása líkti Sólheimum við skattaskjól, paradís fyrir túrista, nema Sólheimar geymi fatlað fólk en ekki peninga.

Freyja sagði að staða fatlaðs fólks í sögulegu samhengi sé þannig að það hafi verið aðgreint og stofnanavistað frá upphafi. Hélt hún því fram að engar rannsóknir sýni fram á að þetta sé gott og að úrræði eins og Sólheimar sé ákveðin útilokun á fötluðu fólk og komi í veg fyrir að það geti lifað í samfélagi við aðra.

„Ég las það sem þær höfðu að segja og ég ber virðingu fyrir skoðunum fólks, en er ekki sammála skoðunum þeirra í þessu máli. Ég stend í þeirri trú og tel mig vita að þeir sem hér búa, að þeim líður ágætlega. Sólheimar eru bara eitt þeirra úrræða sem eru í boði fyrir fólk með fötlun og á fullan rétt á sér í flóru fjölbreyttra úrræða. Varðandi það sem þær Freyja og Steinunn segja þá er það þeirra skoðun og svo er fjöldi fólks með aðra skoðun“ segir Guðmundur Ármann í samtali við Vísi.

Freyja sagðist hafa heyrt af því að ófatlað fólk komi oft á tíðum á Sólheima til að skoða þar aðstæður og fólk. „Það kemur til að skoða heimkynni fatlaðs fólks sem ræður því ekki sjálft hvort það er þarna. Það finnst mér ekki eðlilegt. Mér finnst svoleiðis eiga að tilheyra fortíðinni,“ sagði Freyja. 

Guðmundur Ármann segist líta fólk sömu augum óháð hvaða útlit eða bakgrunn það hefur. „Ég held að það sé eitt af einkennum sem þessi staður býr yfir. Hér býr fólk með mismunandi bakgrunn, þetta er alþjóðlegt samfélag. Hér býr fólk með fötlun og fólk sem kemur alls staðar að úr heiminum og á öllum aldri, fjölbreyttur hópur af fólki. Barátta fyrir fólk með fötlun finnst mér að eigi að snúast um að bæta rétt og fjölga tækifærum, ekki að tala niður einstök úrræði.  Við þurfum öll fjölbreytileika í tækifærum hvort heldur við erum með fötlun eða ekki.“