Minningartónleikar um lifandi mann

Það brá mörgum í brún þegar auglýstir voru minningartónleikar um söngvarann Valdimar Guðmundsson í gær og viðbrögðin létu ekki á sér standa á samfélagsmiðlum. Blessunarlega eru þessar fregnirnar af andáti Valdimars stórlega ýktar og hann er sprelllifandi eins og sjá má.

„Ég var á Improv-Ísland sýningu og skyndilega fór allt á fullt í símanum mínum. Ég þurfti að fara beint í það að sannfæra fólk um að ég væri á lífi," segir Valdimar og bætir við að hann hafi verið búinn að vara nánustu ættingja við áður en auglýsingin fór í loftið.

Tilgangurinn var þó ekki einvörðungu til gamans en Valdimar segir auglýsinguna, sem er úr smiðju auglýsingastofunnar EnnEmm, byggða á draumi sem hann eitt sinn dreymdi.

„Að hluta til allavega. Mig dreymdi að ég væri að deyja og átti erfitt með að ná andanum. Í kjölfarið spyr svo umboðsmaðurinn minn mig hvort mig langi að vera valdur af enn einum minningartónleikunum í Hörpu og ég var að sjálfsögðu ekki spenntur fyrir því," sagði Valdimar.

Valdimar hefur áður tjáð sig opinberlega um áhyggjur af heilsufari sínu og þá staðreynd að hann vilji létta sig og komast í betra form. Nú er hann sem sé búinn að taka að sér hlutverk maraþonmannsins og ætlar að fara 10 kílómetra í Reykjavíkurmaraþoninu. Og Valdimar segir það ótvíræðan kost að fara í átak sem þetta með svona opinberum hætti.

„Það er bara gott. Þá er ég að setja meiri pressu á sjálfan mig og það er bara af hinu góða," segir Valdimar.

En þó líkamsræktin verði stór hluti af lífi Valdimars á næstunni lofar hann því að leggja sönghæfileikana ekki á hilluna.

„Þó ég sé mikill maraþonmaður þá er ég fyrst og fremst tónlistarmaður," segir Valdimar.

Kollegar Valdimars, þeir Jógvan Hansen, Matthías Matthíasson og Friðrik Ómar samþykktu góðfúslega að taka þátt í að auglýsa hina tilbúnu minningartónleika og koma fyrir á veggspjaldinu.

Þeir hyggjast allir gefa greiðslur fyrir þátttöku í auglýsingunni til þess góðgerðarfélags sem Valdimar ákveður að styrkja með þátttöku sinni í Reykjavíkurmaraþoninu.

Valdimar ákvað að safna áheitum til styrktar Krabbameinsfélagsins og geta áhugasamir heitið á Valdimar inni á heimasíðunni www.minaskorun.is.