Anna vart eftirspurn vegna sniðgöngunnar

Neytendur virðast farnir að sniðganga Mjólkursamsöluna í stórum stíl og hafa fært viðskipti sín til annarra mjólkurframleiðenda. Hillur í stórverslunum eru farnar að tæmast af vörum frá mjólkurframleiðendunum KÚ og Örnu.

Ástæða sniðgöngunnar er 480 milljóna stjórnvaldssekt sem Samkeppniseftirlitið lagði nýlega á MS vegna misnotkunar á markaðsráðandi stöðu, en fyrirtækið tilkynnti í kjölfarið að hækka þyrfti vöruverð til að eiga fyrir sektinni.

Eftirspurn eftir mjólkurvörum frá mjólkurvinnslunni Örnu hefur til að mynda aukist mikið, en að sögn framkvæmdastjóra Örnu nær fyrirtækið enn sem komið er að anna eftirspurn.

Ólafur M. Magnússon, framkvæmdastjóri mjólkurbúsins Kú, segir að búast með við að einhver skortur verði á vörum frá fyrirtækinu á næstu dögum, en að starfsfólk geri hvað það geti til að anna eftirspurninni.

„Það er mjög aukin eftirspurn og við höfum verið að senda fleiri pantanir í verslanir. Eins og um helgina kláruðust vörur frá okkur og hingað eru að hringja neytendur til þess að spyrja hvar þeir geta keypt vöruna, fyrirtæki að hringja hingað til þess að óska eftir flytja viðskipti til okkar. Þannig að við finnum fyrir mjög aukinni sölu í verslunum," segir Ólafur.

Hann segir að brugðist verði við meðal annars með því að auka framboð á vörum og að búast megi við nýjum vörum í næsta eða þarnæsta mánuði.

„Núna munu neytendur á næstu vikum sjá aukið framboð frá okkur á vörum. Við munum koma með sýrðar vörur og munum koma með vörur í fernum sem verða mjólkurvörum, bæði sýrðar og ferskar mjólkurvörur, og svo komum við með rifinn ost."

Þá segir hann að flestar verslanir sýni vörum fyrirtækisins mikinn áhuga. Hins vegar sé ákveðnar verslanir sem neiti að skipta við það vegna þeirra deilna sem staðið hafa yfir á milli mjólkurbúsins Kú og MS. Það sé afar dapurt, en að hann virði þá ákvörðun.

„Það er nú svo einkennilegt að á síðasta ári og í kjölfar þess að þessi mál fóru í svona mikla hörku á milli okkar MS þá hefur samvinnuverslun í landinu sniðgengið okkar vörur. Þannig að okkar vörur fást ekki í verslunum Samkaupa og ekki í Skagfirðingabúð og verslunum Kaupfélags Skagfirðinga," segir Ólafur.

„Þetta er auðvitað bara dapurlegt en við erum ekki að ergja okkur á því. Við finnum fyrir velvild neytenda og án þeirra stuðnings gætum við þetta ekki. Þær verslanir aðrar sem eru á markaðnum hafa stutt okkur með ráð og dáð, sýnt okkur ótrúlegt umburðarlyndi og velvilja og fyrir það er ég fyrst og fremst þakklátur. Við erfum það ekki þó einhverjir taki afstöðu til þessara mála á þessum grunni."