Óttarr segir forsætisráðherra rúinn trausti

Formaður Bjatrar framtíðar segir augljóst að Sigmundur Davíð Gunnlaugsson forsætisráðherra hafi ákveðið að halda mjög mikilvægum hagsmunum leyndum fyrir þjóðinni og samstarfsflokki Framsóknarflokksins í ríkisstjórn. Hann sé rúinn trausti og því nauðsynlegt að kanna stuðning þingmanna við hann.

Ummæli Sigurðar Inga Jóhannssonar sjávarútvegs- og landbúnaðarráðherra í fréttum Stöðvar tvö í gær eftir ríkisstjórnarfund; þegar hann var spurður hvort eðlilegt væri að forsætisráðherra og eiginkona hans ættu stóra fjármuni á Tortola,  hafa vakið mikla athygli. En þar sagði ráðherrann þetta:

„Það er auðvitað augljóslega talsvert  flókið að eiga peninga á Íslandi. Það er ekkert að því að fólk sé efnað á Íslandi.“

En að eiga peninga á Tortola?

„Einhvers staðar verða peningarnir að vera,“ sagði Sigurður Ingi.

Óttarr Proppé formaður Bjartrar framtíðar segir þetta vera dæmalaus ummæli.

„Ég hef svo sem ekki mikla reynslu af því að eiga mikla peninga á Íslandi. En manni heyrist nú að það sé kannski erfiðara að eiga ekki peninga á Íslandi en að eiga of mikla peninga á Íslandi,“ segir Óttarr.

Ráðherrann sé væntanlega að vísa í tiltekið ástand í þjóðfélaginu eftir hrun þar sem sumir geti átt fjármuni í aflandsfélögum eftir leiðum sem standi almenningi ekki til boða.

„Það er þessi aðstöðumunur sem fer svona öfugt ofan í fólk.  Þegar kemur í ljós að kjörnir fulltrúar eru í þessum hópi þá náttúrlega skil ég mjög vel að fólk sé hlessa og slegið,“ segir Óttarr.

Það sé dæmalaust að menn átti sig ekki á ábyrgð sinni sem kjörnir fulltúar um að hagsmunaskráning þeirra sé í lagi. Hann sé verulega sleginn yfir þessari stöðu. Það hafi átt sér stað forsendubrestur frá kosningum þar sem upplýsingum og hagsmunum hafi verið haldið leyndum fyrir kjósendum.

„Við höfum verið að horfa sérstaklega á mál forsætisráðherra. Það er augljóst að hann hefur ákveðið að halda mjög mikilvægum hagsmunum leyndum. Ekki bara fyrir þjóðinni heldur líka fyrir samstarfsflokknum í þeirri vinnu sem hefur verið í gangi í sambandi við afnám hafta,“ segir formaður Bjartrar framtíðar.

Þetta sé vond staða og því nauðsynlegt að rjúfa þing og boða til kosninga eins og stjórnarandstaðan leggi til eftir helgi.

„Ég finn finn að hann er að mörgu leyti rúinn trausti í samfélaginu og mér finnst mikilvægt að það komi þá í ljós hvort hann hafi traust þingmanna í eigin flokki og í samstarfsflokknum, Sjálfstæðisflokknum,“ segir Óttarr Proppé.