Innlent

Flókið að eiga peninga á Íslandi að mati atvinnuvegaráðherra

Heimir Már Pétursson skrifar

Atvinnuvegaráðherra segir augljóslega talsvert flókið að eiga peninga á Íslandi. Umræðan um eignarhaldsfélög ráðherra og maka þeirra í útlöndum hafi ekki veikt ríkisstjórnina. Heilbrigðisráðherra segir umræðuna hins vegar hafa augljós áhrif og nauðsynlegt sé að ræða málin í þingflokki Sjálfstæðisflokksins.

Ríkisstjórnin afgreiddi nokkur mál frá borði sínu í dag en aflandsmál ráðherranna voru ekki rædd. Hvorki Bjarni Benediktsson fjármálaráðherra né Ólöf Nordal innanríkisráðherra voru á fundinum; fjármálaráðherra í útlöndum og innanríkisráðherra í veikindaleyfi. Eignarhaldsfélög í eigu ráðherra og maka þeirra í Luxemburg og á aflandseyjum hafa heltekið pólitíska umræðu í landinu undanfarna daga, en bæði Bjarni og Ólöf birtu í gær útskýringar á félögum í þeirra eigu á Facebook.

Bjarni taldi félag sem hann átti hlut í reyndar vera í Luxemburg en ekki Seychelles-eyjum eins og raunin er en félagið hafi verið lagt niður árið 2009 án þess að hafa sinnt nokkrum viðskiptum. Þá segir Ólöf að félag sem Landsbankinn stofnaði fyrir eiginmann hennar í Luxemburg aldrei hafa komist í eigu hans og verið úr sögunni áður en hún var kosin á þing.

Ráðherrarnir voru mismikið að flýta sér eftir ríkisstjórnarfund í dag. Þannig gaf Eygló Harðardóttir félagsmálaráðherra ekki kost á viðtali og sagðist vera orðin sein á fund. En Kristján Þór Júlíusson heilbrigðisráðherra sagði að loknum ríkisstjórnar fundinum að málin yrðu rædd á þingflokksfundi Sjálfstæðismanna sem hófst klukkan sex í dag.

Heldur þú að þetta hafi eitthvað veikt ríkisstjórnina, þessar upplýsingar?

„Það held ég ekki,“ sagði Kristján Þór

Og þú trúir því að þetta séu allt eðlilegar skýringar sem hafa komið fram?

„Ég hef engar forsendur til annars en taka þær eins og þær eru settar fram.“

Þér finnst að þetta ætti ekkert að trufla ríkisstjórnina né traust á henni?

 „Auðvitað hefur öll þessi umræða einhver áhrif. Við þurfum að taka þá umræðu innan okkar raða og hef engar ástæður til að ætla annað en við vinnum okkur út í gegnum það,“ sagði Kristján Þór.

„Einhvers staðar verða peningarnir að vera“

Sigurður Ingi Jóhannsson atvinnuvegaráðherra sagði þessa umræðu orðna langa.

„Og talsverður misskilningur að um sé að ræða skattaskjól eða aflandsfélög eins og menn hafa greint frá. Þannig að ég tel stöðu ríkisstjórnarinnar býsna sterka og met það út frá því hvernig staða mála er hér í landinu á flestum sviðum,“ sagði Sigurður Ingi.Þeir staðir sem nefndir hefðu verið væru hins vegar eðlilega ekki í hávegum hafðir hjá almenningi en engin lög hafi verið brotin í málum ráðherranna og allir skattar greiddir. Sigmundur Davíð Gunnlaugsson forsætisráðherra og kona hans hafi greint mjög vel frá sínum málum með skýrum greinargerðum og yfirlýsingum.

Er eðlilegt að forsætisráðherrann og kona hans eigi stórar upphæðir á Tortola?

„Það er auðvitað augljóslega talsvert  flókið að eiga peninga á Íslandi. Það er ekkert að því að fólk sé efnað á Íslandi,“ segir Sigurður.

En að eiga peninga á Tortola?

„Einhvers staðar verða peningarnir að vera. Ég er ekki viss um að umræðan ef forsætisráðherrafrúin hefði verið í miklum fjárfestingum á Íslandi væri í meira jafnvægi.“

En þetta eru stórar fjárhæðir og þetta er eitthvað sem almenningi býðst ekki að hafa fjármuni þarna. Það er dálítill aðstöðumunur?

„Fólk hefur misjafnar aðstæður,“ sagði Sigurður Ingi Jóhannsson. 


Tengdar fréttir

Tíu þúsund manns kalla eftir afsögn

Tíu þúsund manns hafa nú skrifað undir í undirskriftasöfnun á netinu þar sem þess er krafist að Sigmundur Davíð Gunnlaugsson segi af sér sem forsætisráðherra og þingmaður.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×