Göngufólk á Vatnaleið styggir fé á afréttinum

Ört vaxandi fjallaferðamennska er farin að valda íslenskum fjárbændum áhyggjum.

Málið var rætt á fundi fjallskilanefndar Borgarhrepps, Stafholtstungna og Norðurárdals vestan Norðurár fyrir helgi. Þriðju og síðustu leitir haustsins á svæði nefndarinnar voru sunnudaginn 16. október og skiluðu þær um eitt hundrað kindum og nokkrum erlendum ferðamönnum sem fest höfðu jeppa sinn á fjöllum.

„Það er orðið dálítið mikið um gönguhópa sem fara svokallaða Vatnaleið. Þetta er náttúrlega einmitt yfir sumartímann þegar féð er á svæðinu,“ segir Sigurjón Jóhannesson, bóndi á Valbjarnarvöllum á Mýrum og fulltrúi í fjallskilanefndinni sem ræddi „aukinn ágang ferðamanna á afréttinum, gangandi og akandi“ á síðasta fundi:

„Nefndin lýsir yfir áhyggjum sínum af áhrifum þess á sauðfé og vekur athygli á að auka þarf þjónustu og eftirlit með mannvirkjum samfara þeirri þróun,“ bókaði nefndin.

Sigurjón segir hópa á eigin vegum og frá Ferðafélagi Íslands ganga Vatnaleiðina sem liggur frá Hlíðarvatni um Hítarvatn og Langavatn í Hreðavatn. Og það sé gott mál.

„Aðalmálið, finnst mér, er ef fólk er með hunda sem eru ekki vanir fé. Þeir eru til í það að stökkva í kindur og styggja þær. Við höfum rætt að fólk hafi hundana í bandi þegar farið er um þar sem aðalfjársvæðið er,“ segir Sigurjón.

Það er ekki aðeins göngufólk sem fer um þessar slóðir að sögn Sigurjóns. Mikil jeppaumferð sé um troðninga inn Langavatnsdal.

„Menn eru að keyra þar og er í sjálfu sér ekkert hægt við því að gera,“ segir Sigurjón. Í fyrrnefndum leitum fyrir rúmum hálfum mánuði hafi smalar komið til hjálpar útlendingum sem skilið höfðu bíl sinn eftir kirfilega fastan í drullu.

„Það átti að fara að leita að þeim en það var hægt að ná sambandi einhvers staðar og þá uppgötvaðist að þeir voru ekki týndir. Þeir slógu sér bara saman við leitarmenn,“ lýsir Sigurjón. Erlendir ökumenn aki óhikað út í hvað sem er. „Það er reyndar líka þannig með suma Íslendinga, þeir halda að það fljóti alla vega á meðan ekki sekkur.“

Fjallskilanefndin skoraði á fundinum einnig á sveitarstjórn Borgarbyggðar að beita sér fyrir því að komið verði á farsímasambandi á svæðinu. Sigurjón segir að það myndi bæta öryggi til muna.

„Það er merkilegt að ekki skuli að minnsta kosti vera búið, á fjölfarinni leið eins og inn Langavatnsdal, að setja upp endurvarpa svo þar sé samband. Að vísu er hægt að fara þar sem hæst er upp en útlendingar fatta það ekki. Þeir festa bíla þarna og ganga þá kannski langar leiðir í stað þess að fara upp.“ 

Fréttin birtist fyrst í Fréttablaðinu