Aron Rafn skoraði meira en Ólafur Bjarki

Eisenach varð í kvöld fyrsta liðið til að taka stig af Bietigheim-Metterzimmern á heimavelli í þýsku B-deildinni í handbolta.

Leik liðanna í kvöld lyktaði með jafntefli, 33-33, en Eisenach jafnaði metin með flautumarki.

Aron Rafn Eðvarðsson og félagar í Bietigheim eru á toppi B-deildarinnar með 26 stig, þremur stigum á undan N-Lübbecke.

Aron Rafn varði níu skot í marki Bietigheim, eða 33,3% þeirra skota sem hann fékk á sig í leiknum.

Aron Rafn skoraði að auki eitt mark í leiknum.

Ólafur Bjarki Ragnarsson komst ekki á blað í liði Eisenach og klikkaði á eina skotinu sem hann tók í leiknum. Eisenach er í 6. sæti deildarinnar.