Berskjaldaðir á sviði í tilefni jólanna

Um jólin tíðkast að skella sér á tónleika og nánast hver einasti tónlistarmaður á landinu er með einhvers konar jólatónleika í desem­ber. Nú er hægt að breyta út af vananum og skella sér á jólaspuna – en spunahópurinn Svanurinn heldur jólasýningu í Tjarnarbíói í kvöld.

„Við erum spunahópur sem er búinn að sýna spunasýningar með Improv Ísland og sérhæfum okkur í því. En þessi sýning er jólasýning vegna þess að við ætlum að bæta við „elementum“ sem eru ekki spuni – þannig að þetta verður að hluta til spuna-show og að einhverjum hluta til atriði sem við erum búnir að æfa og eru hönnuð til að koma fólki í jólaskapið. Það er rosa langt fyrir utan þægindaramm­ann okkar að plana grínið fyrir fram, þannig að þetta ætti að verða ansi áhugaverð tilraun,“ segir Guðmundur Felixson, einn spunameistaranna úr spunahópnum Svaninum aðspurður hvernig jólaspuni sé öðruvísi en annar spuni.

Hvernig ætlið þið út fyrir þægindarammann?

„Sumum finnst mjög óþægilegt að hugsa til þess að fara upp á svið og spinna en mér hefur alltaf fundist það mjög þægileg tilhugsun því að ef það er ekkert fyndið þá getur maður alltaf sagt að þetta hafi nú ekkert verið ákveðið fyrir fram og hafi aldrei verið ætlunin að þetta hafi endilega átt að vera fyndið – þannig að við stöndum svolítið berskjaldaðir, er það ekki hinn sanni andi jólanna?

En neinei, svo eiga nú þessi atriði sem eru ekki spuni ekki endilega neitt að vera fyndin, heldur falleg og skemmtileg – við ætlum að syngja og bara gera þetta almennilega.“

Í fyrra hélt hópurinn sína fyrstu jólasýningu og var hún haldin á Bar 11, þá töluvert minni í sniðum en í ár, en núna fer hún fram í Tjarnarbíói.

Munuð þið nota þetta aukna rými í aukaskammt af sprelli?

„Já við erum náttúrulega vanir að sýna í pínulitlu rými í Þjóðleikhúskjallaranum. Það er töluvert mikið umstang í kringum þetta núna, við erum búnir að vera að vinna tæknivinnuna núna síðustu daga og það tekur alveg töluvert lengri tíma en maður er vanur vegna þess að það er ekkert hægt að ljósahanna spunasýningu, en við getum ljósahannað aðeins núna. Þannig að já, við erum að nýta okkur alla vega tæknibúnaðinn í Tjarnarbíói til að gera dálítið show.“

Má þá búast við miklum tæknibrellum, til dæmis að þið verðið með einhvern hangandi í vír? Það myndi auðvitað gagnast í uppsetningu á til dæmis Jólasögu Dickens eða það gæti mætt engill í Tjarnarbíó.

„Nei, reyndar ekki, en við ætluðum að gera það. Við báðum Tjarnarbíó um leyfi fyrir að hengja einn af leikurunum upp í vír, en það reyndist of flókið þannig að í staðinn munum við nota mjög frumstæða tækni sem kallast á mannamáli vinnulyfta – það verður áhugavert að sjá hvað kemur út úr því.“

Ásamt Guðmundi eru í Svaninum sex aðrir liðsmenn – Adolf Smári Unnarsson, Auðunn Lúthersson, Máni Arnarson, Pálmi Freyr Hauksson, Ólafur Ásgeirsson og Guðmundur Einar. Hópurinn var stofnaður fyrir þremur árum en þeir strákarnir koma allir úr hópnum Improv Ísland. Það er hægt að tryggja sér miða á sýninguna á Miði.is.