Stöðvaði símaþjóf með óhefðbundnum hætti

Vörubílstjórinn Huo beitti frekar óhefðbundinni aðferð til að stöðva mann sem hafði rænt af honum símanum í Kína. Maðurinn reyndi að keyra á brott á vespu en Huo hljóp upp stýrið á vespunni og skutlaði sér á þjófinn. Manninum hefur verið lýst sem „Kung-Fu meistara“ eftir að myndband af atvikinu fór í dreifingu á internetinu.

Huo hafði stöðvað bíl sinn til að skila af sér vörum og gekk þjófurinn upp að bílnum hans. Huo hélt í fyrstu að maðurinn væri kominn til að taka á móti vörunum, en hann stökk inn í bílinn hjá Huo og stal síma hans. Því næst gekk hann á brott og reyndi að keyra í burtu á vespu.

Þjófurinn þurfti þó að taka U-beyju og Huo mætti honum hinu megin á götunni.

Í stað þess að koma sér undan vespunni hljóp Huo á móti henni og stökk á þjófinn svo hann datt í götuna.

Samkvæmt Mashable, sem vitnar í héraðsmiðla í Kína, hefur manninum verið lýst sem Bruce Lee endurfæddum og hefur hann einnig verið kallaður Kung Fu meistari. Huo segir að þremur símum hafi verið stolið frá sér á einungis tveimur mánuðum og því er skiljanlegt að hann hafi verið reiður.