Ná norsku stelpurnar í sjötta gullið undir stjórn Þóris?

Titilvörn norska kvennalandsliðsins í handbolta hefst í kvöld þegar það mætir Rúmeníu í D-riðli á EM í Svíþjóð.

Það er óhætt að segja að stelpurnar hans Þóris Hergeirssonar fái verðugt verkefni í fyrsta leik en Rúmeníu hefur á mjög sterku liði að skipa.

Auk Noregs og Rúmeníu eru Króatía og Ólympíumeistarar Rússlands í D-riðlinum sem er leikinn í Helsingborg. Þrjú efstu liðin fara áfram í milliriðla.

Nýr þjálfari Rúmeníu er Spánverjinn Ambros Martín sem hefur komið liðum í undanúrslit Meistaradeildar Evrópu fjórum sinnum frá 2011 og unnið keppnina tvisvar sinnum, einu sinni með Itxako frá Spáni og einu sinni með ungverska stórliðinu Györ.

Með Györ leika tveir af bestu leikmönnum norska landsliðsins; markvörðurinn Kari Aalvik Grimsbø og skyttan Nora Mørk. Línumaðurinn öflugi, Heidi Löke, leikur einnig með Györ og norska landsliðinu en hún er í fríi frá handbolta þar sem hún er barnshafandi.

EM í Svíþjóð er tíunda stórmótið sem Þórir fer með norska liðið á en á fimm af þessum mótum hefur Noregur dregist í riðil með Rúmeníu. Það gerðist á HM 2009 og 2015, EM 2014 og 2016 og á Ólympíuleikunum 2016. Auk þess mætti Noregur Rúmeníu í undanúrslitum á HM 2015.

Noregur hefur alltaf haft betur gegn Rúmeníu á stórmótum undir stjórn Þóris. Síðustu tveir sigrarnir voru þó naumir. Í undanúrslitunum á HM 2015 vann Noregur tveggja marka sigur, 35-33, á Rúmeníu eftir framlengingu. Og á Ólympíuleikunum í sumar unnu norsku stelpurnar eins marks sigur, 28-27, í hörkuleik.

Níu af sextán leikmönnum í norska EM-hópnum voru í Ólympíuhópnum í sumar. Eins og áður sagði verður Löke ekki með og það munar um minna enda frábær leikmaður.

Þrjár í norska hópnum er að fara á sitt fyrsta stórmót. Þetta eru þær Silje Waade, Malin Aune og Kjerstin Boge Solås. Sú síðastnefnda verður ekki 19 ára fyrr en á gamlársdag en hún er yngsti leikmaður Noregs á stórmóti fyrr og síðar. Solås hefur aðeins leikið sex landsleiki, líkt og Waade. Aune er aðeins reyndari en hún á 14 landsleiki að baki.

Þórir hefur náð frábærum árangri með norska liðið síðan hann tók við þjálfun þess 2009. Noregur hefur unnið til verðlauna á átta af níu stórmótum undir stjórn Selfyssingsins; fimm gull, eitt silfur og tvö brons.

Eins og áður sagði er Noregur ríkjandi Evrópumeistari. Norska liðið vann það spænska, 28-25, í úrslitaleiknum í Búdapest í Ungverjalandi fyrir tveimur árum.

Leikur Noregs og Rúmeníu hefst klukkan 19:45 í kvöld.