Ræninginn í Ólafsvík enn í haldi lögreglu

Karlmaðurinn, sem framdi vopnað rán í apótekinu í Ólafsvík laust fyrir klukkan sex í gærkvöldi, er enn í haldi lögreglu ásamt konu, sem var í fylgd með honum þegar bíll hans var stöðvaður tveimur klukkustundum síðar á Snæfellsnesvegi, skammt frá Haffjarðará.

Hann ógnaði starfsfólki apóteksins með hnífi og komst undan með talsvert af lyfjum. Hann ók af vettvangi og var lögregla frá Akranesi send á móti honum og stöðvaði hann á fyrrnefndum stað.

Starfsfólki apóteksins var illa brugðið og var boðið áfallahjálp, en engan sakaði. Óstaðfestar fregnir herma að ræninginn sé af erlendu bergi brotinn en að fylgdarkonan sé íslensk.