Kristinn Hrafnsson sakar Séð og heyrt um aumustu lágkúru

Kristinn Hrafnsson hjá Wikileaks hellir sér yfir Ástu Hrafnhildi Garðarsdóttur, ritstjóra Séð og heyrt og sakar um yfirgengilega lágkúru. Hann segir að á síðustu forsíðu hafi blaðið slitið sambandi sínu við Gígju Skúladóttur. En það er algerlega úr lausu lofti gripið.

„Ja hérna hér. Það var verið að benda mér á að Séð og Heyrt hefði í dag ákveðið, á forsíðu, að slíta sambandi mínu og gera mig einhleypan. Þetta voru talsverðar fréttir fyrir okkur Gígja Skúladóttir. Ef blaðið hefði aðeins vandað heimildarvinnuna og lagst í smávægilegar rannsóknir, t.d. hringt í mig, hefði það ekki gert sjálft sig að þessu ótrúlega rusli, enn eina ferðina. Skrápurinn á mér er þverhandarþykkur en svona óðgeðslegheit geta verið særandi fyrir aðra sem málið varðar. Kappið og sóknin eftir aumustu lágkúru er yfirgengileg,“ segir Kristinn á Facebooksíðu sinni, og ljóst er að það er þungt í honum.

Kristinn verður líka á næstu forsíðu Séð og heyrt

Vísir náði tali af Ástu Hrafnhildi en hún er nú stödd úti í London að kaupa jólagjafir. Hún var létt og kát og virtist ekki hafa þungar áhyggjur af þessari yfirhalningu.

„Okkar vinnubrögð eru þannig að við hringjum nánast undantekningarlaust í fólk. En við töldum okkur hafa mjög áreiðanlegar heimildir fyrir þessu. Fengum ábendingar um það frá þó nokkuð mörgum aðilum að þessi væri staðan. Og þar sem um svo margar ábendingar var að ræða töldum við að málið væri svona vaxið.“

Ásta Hrafnhildur segir að hún muni að sjálfsögu leiðrétta þetta í næsta blaði og biðja viðkomandi afsökunar. „Kristinn verður á forsíðu næsta tölublaðs líka, ásamt risastórri afsökunarbeiðni. Alveg sjálfsagt mál.“

Ástarmál Ástu sjálfrar í kastljósinu

Varðandi þetta með að Ásta Hrafnhildur og Séð og heyrt sé yfirgengileg lágkúra sem stundar að birta ógeðslegheit sem særa fólk segist hún ekki hafa neitt um það að segja.

„Ég hef heyrt og séð svo margt í þessu starfi, bæði sem blaðamaður undir ritstjórn Eiríks Jónssonar og svo sjálf sem ritstjóri. Það verður hver og einn af hafa þessi orð um hlutina sem þeim þykir best til þess fallin. Ef Kristinn vill lýsa þessu með þessum hætti þá eru það bara hans orð. Ég legg ekki í vana minn að munnhöggvast við fólk, það er ekki minn stíll. Og gerir ekki lífið skemmtilegra eins og Séð og heyrt á að gera.“

En, talandi um þetta og Eirík verður ekki hjá því komist að spyrja Ástu Hrafnhildi um ástarmál hennar sjálfrar. Eiríkur Jónsson birti frétt á vef sínum þar sem segir að hún sé komin með „nýjan herra upp á arminn en sá er Björn Jón Bragason ritstjóri Reykjavík Vikublað. Ásta hefur verið í tygjum við stjörnulögfræðinginn Svein Andra að undanförnu en svo ótrúlega vill til að hann lækar myndbirtinguna á Facebook fyrstur manna!“

Er að „deita“ Svein Andra ekki Björn Jón

Ásta Hrafnhildur hlær dátt þegar hún er spurð út í þennan nýjasta kærasta.

„Þetta er mjög einfalt. Staðan er eftirfarandi að á kosningakvöldi var ég að labba um með Birni Blöndal ljósmyndara mínum, fór á milli kosningamiðstöðva. Leit við hjá Sjálfstæðismönnum og þar svifu á mig hinir ýmsu menn sem vildu fá af sér myndir með mér. Meðal annars Baldvin Jónsson og það birtist í Mogganum. Og svo er það þessi ungi maður sem kynnti sig, vildi ræða um blaðið og það smellti ung kona ljósmynd af því.“

Ásta Hrafnhildur segir þetta tilbúning hjá lærimeistara sínum í blaðamennskunni, Eiríki Jónssyni. Vísir spurði hana þá út í sambandið við Svein Andra. Ásta vildi fyrst engu svara en gaf sig svo og sagði að þau væru að „deita“.

„Já, það er staðreynd. Eiríkur Jónsson á það til að gifta mig reglulega. Ég veit ekki hvort það er hvort honum þyki ég ekki nógu sniðug að velja mér mannsefni og gæti verið að hann vilji hlutast til um þetta. Hann hefur ákveðnar skoðanir á þessu og hefur alltaf haft.“