Mikill áhugi á nýsköpun í orkuiðnaði um allt land

Mikill áhugi er á því að vinna að nýsköpun í orkuiðnaði um allt land. Þetta kom fram á málstofum sem Landsvirkjun stóð fyrir í sumar, undir yfirskriftinni „Virkjum hugaraflið“. Ýmsar áhugaverðar hugmyndir komu fram á málstofunum, sem voru vel sóttar og haldnar í samstarfi við KPMG, Nýsköpunarmiðstöð Íslands og Íslenska jarðvarmaklasann.

Með málstofunum, sem fóru fram á Húsavík, Egilsstöðum, Blönduósi og Selfossi, var leitast við að vekja athygli á þeim tækifærum sem liggja í orkuiðnaði, kynna þann stuðning sem frumkvöðlum stendur til boða og bjóða heimamönnum til samtals um nýsköpunarhugmyndir þeirra.

Fjölmargar áhugaverðar hugmyndir­

Niðurstaðan var sú að mikill áhugi er á því að vinna að nýsköpun í orkuiðnaði um allt land. Hitaveita á köldum svæðum, nýting ónýttra jarðhitastrauma, ferðaþjónusta, varmadælur, öpp, jarðhitabaðströnd og heilsulind voru á meðal áhugaverðra hugmynda sem komu fram. Heimamenn á hverjum stað fyrir sig lýstu yfir miklum áhuga á því að halda áfram á lofti nýsköpun í orkuiðnaði sem áhugavert verður að fylgjast með á næstunni.

Orkuiðnaður á tímamótum

Fulltrúar Landsvirkjunar á málstofunum kynntu sýn fyrirtækisins á nýsköpun í orkugeiranum, bentu á þau tækifæri sem þar liggja og hvöttu frumkvöðla til dáða. Í máli þeirra kom m.a. fram að íslenskur orkuiðnaður stendur á tímamótum þessi misserin – svipuðum og sjávarútvegurinn fyrir 30 árum. Með þeim takmörkunum sem þá voru lagðar á fiskveiðar varð ljóst að leita þyrfti annarra leiða til að fá meira út úr hverju veiddu kílói. Það ýtti undir þá miklu nýsköpun sem átt hefur sér stað í greininni á liðnum árum, m.a. í bættum vinnsluaðferðum, nýtingu aukaafurða í snyrtivörur, lyf, tískufatnað o.s.frv. Svipuð alda nýsköpunar gæti verið framundan í orkugeiranum með bættri nýtingu og margskonar hliðarafurðum.

Þorsteinn Ingi Sigfússon, forstjóri Nýsköpunarmiðstöðvar Íslands, fór yfir þau ónýttu tækifæri sem liggja í orkuauðlindum Íslands, ekki síst í jarðhita. Hann fór einnig yfir víðtækan stuðning miðstöðvarinnar við frumkvöðla í orkugeiranum og yfirgripsmikla sérþekkingu starfsmanna hennar á því sviði. Þá sagði hann frá fyrirtækinu XRG Power, sem þróar umhverfisvænar einkarafstöðvar sem nýta lágvarma, en fyrirtækið á rætur að rekja til Nýsköpunarmiðstöðvar Íslands.

Víðtækur stuðningur í boði

Stefán Þór Helgason, ráðgjafi hjá KPMG, ræddi um það hvernig hugmyndir verða til, hvað þarf til að gera þær að veruleika og hvernig hægt sé að kanna gæði hugmynda. Hann fjallaði einnig um þann víðtæka stuðning sem stendur frumkvöðlum til boða s.s. samkeppnir, viðskiptahraðla, húsnæði og fjármagn.

Viðar Helgason, klasastjóri Íslenska jarðvarmaklasans, kynnti loks viðskiptahraðalinn Startup Energy Reykjavík en markmið hans er að styðja við frumkvöðla í orkugeiranum með margvíslegum hætti. Þátttakendum býðst m.a. aðstoð sérfræðinga, fyrirlestrar og námskeið og skrifstofuhúsnæði í tíu vikur og 5 milljónir króna í hlutafé.

Aukin þátttaka kvenna

Eitt af fagnaðarefnum þessarar fundaraðar var að finna fyrir öflugri þátttöku og áhuga kvenna. Karlar hafa lengi verið í meirihluta þeirra sem hafa látið að sér kveða í orkumálum. Nú sjáum við fleiri konur sýna orkumálum áhuga og þær láta í auknum mæli að sér kveða.

Þessi grein birtist fyrst í Fréttablaðinu.