Gríðarlegt álag á starfsmönnum Útlendingastofnunar: Rúmlega 180 hælisumsóknir hafa borist í nóvember

Rúmlega 180 manns hafa sótt um hæli hér á landi í nóvember en síðast í gær komu 43 til landsins og sóttu um hæli. Staðgengill forstjóra Útlendingastofnunar segir gríðarlegt álag á starfsmönnum stofnunarinnar. Þá eru búsetuúrræði öll yfirfull en gerður hefur verið samningur um leigu á gamla Herkastalanum.

„Þetta færir heildartöluna okkar yfir árið í 940 umsóknir eins og staðan er í dag,“ segir Þorsteinn Gunnarsson, staðgengill forstjóra Útlendingastofnunar.

Stofnunin sjái tölurnar alltaf hækka á milli mánaða en í október var heildarfjöldi umsókna um 200. Október var stærri en september og nóvember verði stærri en október. 

Felstir hælisleitendur koma á miðvikudögum og sunnudögum og hefur Útlendingastofnun tengt þá þróun við ákveðnar flugleiðir frá vestur-Balkanríkjunum en um 86% þeirra sem hafa sótt um hæli í nóvember koma þaðan.

Árið 2015 störfuðu 38 manns hjá Útlendingastofnun en í dag starfa þar um 70 manns. Hins vegar hefur á sama tíma fjöldi umsókna um vernd tæplega þrefaldast. 

„Það er gríðarlega mikið álag á okkar starfsfólki þessa dagana og þetta er búið að vera mjög erfitt tímabil fyrir okkur. Það sem er verst í þessu er að þetta hefur áhrif á þá þjónustu sem við getum veitt þeim einstaklingum sem til okkar leita. Þjónustustigið hjá okkur er lækkandi eins og staðan er í dag,“ segir Þorsteinn.

Þá eru öll búsetuúrræði Útlendingastofnunar yfirfull og reynir stofnunin eftir fremsta megni að útvega meira húsnæði. Á næstu dögum munu til að mynda um 100 hælisleitendur flytja inn í gamla Herkastalann í miðbæ Reykjavíkur.

Það er fleiri að vinna að þessum málum en á dögunum ákvað ungmennahópur Rauða krossins í Reykjavík og Ungmennaráð Barnaheilla að slá til og hefja leikfangasöfnun fyrir börn í hælisleit.  Talsvert mikið af fólki hefur gefið leikföng. Söfnunin heldur áfram á morgun og á næstu dögum verði lögföngunum raðað í pakka og þeim dreift til barnanna.