Nágrannasveitarfélög ræða við Borgarleikhúsið um stuðning

Leikfélag Reykjavíkur, sem rekur Borgarleikhúsið, hefur óskað eftir viðræðum við bæjarstjórnir annarra sveitarfélaga höfuðborgarsvæðisins en Reykjavíkurborgar um að tengjast rekstri leikhússins með beinum hætti.

Kristín Eysteinsdóttir, leikhússtjóri Borgarleikhússins, segist hafa fengið jákvæð viðbrögð við óskinni um viðræður.

Bæjarstjórar Mosfellsbæjar og Garðabæjar munu funda með forsvarsmönnum leikhússins. Bæjarráð Kópavogs vísar erindinu til bæjarritara til umsagnar, bæjarráð Hafnarfjarðar sér sér þó ekki fært að verða við erindinu.

„Þetta er hugmynd sem hefur verið rædd mikið hér síðustu ár, við erum að stíga þetta skref sem við höfum lengi viljað taka,“ segir Kristín.

„Við eigum í mjög góðu samstarfi við Reykjavíkurborg og það eru skólabörn sem njóta sérstaklega aðstöðunnar í Borgarleikhúsinu. Við erum að opna á þá hugmynd að önnur sveitarfélög á höfuðborgarsvæðinu fari inn í sams konar samstarf og Reykjavíkurborg.“

Árlega eru um 20 til 25 leikverk sýnd samtals 500 til 600 sinnum í Borgarleikhúsinu fyrir um 220 þúsund gesti. Árleg velta félagsins er um 1,5 milljarðar. Rekstrarframlag frá Reykjavíkurborg er um 600 milljónir króna auk húseignar, og sjálfsaflafé er um 900 milljónir króna.

„Þetta er hugsað á þeim nótum að sveitarfélögin komi inn í starfsemina með ákveðið fjármagn árlega en fái í staðinn að njóta þessarar sömu þjónustu, sem varðar leikskóla- og grunnskólabörn og eldri borgara. Við erum að opna þetta samtal en það eru engar tölur sem er búið að nefna eða neitt slíkt,“ segir Kristín.

„Við höfum fengið svar frá Garðabæ um að fá að funda með þeim en við höfum ekki fengið fundarboð frá neinum öðrum. En við höfum fengið jákvæð viðbrögð. Næstu skref eru að sjá hvernig við getum stækkað þetta og látið þetta bæði efla leikhúsið og sveitarfélögin.“

Gunnar Einarsson, bæjarstjóri Garðabæjar, staðfestir að hann muni funda með forsvarsmönnum einhvern tímann á næstu vikum. „Mér finnst metnaðurinn og nálgunin mjög góð. En svo er það aftur allt önnur umræða hvort Garðabær taki þátt í að koma að rekstrinum og ég get ekki rætt neina niðurstöðu í því núna."

Haraldur Sverrisson, bæjarstjóri Mosfellsbæjar, staðfesti í samtali við Fréttablaðið að hann muni einnig funda með fulltrúum leikhússins á næstunni. 

Fréttin birtist fyrst í Fréttablaðinu