Um hvaða ríki liggur leið Trump í Hvíta húsið?

Allra augu beinast að Bandaríkjunum nú þegar lokaspretturinn í forsetakosningum þar í landi er hafinn. Donald Trump, forsetaefni Repúblikana, hefur sótt í sig veðrið á undanförnum vikum og eftir að hafa verið nánast úrskurðaður úr leik eftir hvert hneykslið á fætur öðru hafa sigurlíkur hans aukist. Hann reynir nú hvað hann getur til að vinna sigur í Flórída-ríki sem að mörgu leyti er lykillinn að leið hans í Hvíta húsið.

Þrátt fyrir að vera enn sigurstranglegust samkvæmt sérstöku reiknilíkani FiveThirtyEight hafa sigurlíkur Clinton hrunið frá því að FBI gaf út að það væri að rannsaka nýja tölvupósta frá tíð hennar sem utanríkisráðherra. Nú rúmlega einum degi áður en að kosningarnar fara fram segir FiveThirtyEight að sigurlíkur Clinton séu 64 prósent gegn 36 prósentum Donald Trump, um 20 prósentustiga sveifla á tveimur vikum.

Tryggja þarf sér stuðning 270 kjörmanna til þess að sigra í kosningunum og í sömu spá FiveThirtyEight og er vitnað í hér að ofan er reiknað með að Clinton muni hljóta 289 kjörmenn. Þrátt fyrir þetta má velta því fyrir sér hvað þurfi að gerast til þess að Trump takist að komast yfir Clinton og gegna því embætti sem gjarnan er talið vera það valdamesta í heiminum. Leiðin er grýtt en þó ekki ófær.

Án Flórída er nær ómögulegt að Trump geti sigrað

Fastlega má reikna með að Trump muni að minnsta kosti fá um 180 kjörmenn frá ríkjum á borð við Texas, Montana, Alaska, Alabama, Indiana og átján öðrum ríkjum sem sjá má á kortinu hér fyrir neðan. Í öllum þessum ríkjum eru yfirgnæfandi líkur á sigri Trump.

Fyrir utan þessi ríki þarf Trump án vafa að næla í sex kjörmenn Iowa, átján kjörmenn Ohio og ellefu kjörmenn Arizona. Skoðanakannanir benda til þess að þessi ríki hallist að Trump en Iowa og Ohio eru svokölluð „Swing-states“ þar sem stuðningur kjósenda sveiflast á milli forsetakosninga.

Sjá einnig: Hitti skömmustulega Bandaríkjamenn í DC tveimur dögum fyrir kosningar

Takist Trump að næla sér í sigur í þessum ríkjum er talan kominn upp í 215 kjörmenn, enn talsvert fjarri þeim 270 sem þarf til. Þar kemur Flórída til sögunnar. Þar eru 29 kjörmenn undir sem gerir ríkið það mikilvægasta af sveifluríkjum kosninganna í ár. Þar er staðan hins vegar nánast hnífjöfn samkvæmt áðurnefndu reiknilíkani FiveThirtyEight sem metur sigurlíkurnar 46-53 prósent Trump í vil.

Sigri Trump Flórída er það þó ekki nóg enda væri hann þá aðeins búinn að tryggja sér 244 kjörmenn miðað við þá leið sem hér er tíunduð. Hinir 29 kjörmenn Flórída eru þó svo mikilvægir að takist Trump ekki að sigra í Flórída þyrfti hann líklega einnig að sigra í sveifluríkjum sem Clinton er nær örugg um að sigra í á borð við Pennsylvaníu, Colorado og New Hampshire.

Leiðin er þó langt í frá greið fyrir Trump takist honum að sigra í Florída, hann þarf einnig að vinna annað sveifluríki, Norður-Karólínu, þar sem afar mjótt er á milli Trump og Clinton, líkt og í Flóría. Þar leynast 15 kjörmenn og Trump því kominn með 259 kjörmenn.

Sjá einnig: FBI dregið inn í hringiðu stjórnmála

Þaðan þarf Trump að finna sér ellefu kjörmenn í viðbót sem verður afar erfitt fyrir hann. Hann þarf án vafa að tryggja sér sigur í 1-2 af þeim sveifluríkjum sem nú eru talin örugg í höndum Clinton. Þessi ríki eru Michigan, Wisconsin, Virginía, Colorado, Pennsylvanía og New Hampshire. Svo örugg er Clinton um sigur í þessum ríkjum að þau eru nefnd eldveggur hennar. Nafnið kemur til vegna þess að hún þarf í raun ekki að sigra í öðrum sveifuríkjum tryggi hún sér sigur í þessum sex ríkjum.

Helstu möguleikar Trump á þessum ellefu kjörmönnum eru taldir liggja í Michigan þar sem kannanir sýna að Trump hefur sótt vel á. Sextán kjörmenn eru þar í boði sem myndi koma Trump í 275 kjörmenn gangi það eftir sem hér hefur verið útlistað.

Leið Trump að sigri lítur því nokkurn veginn svona út fyrir utan þau ríki sem hallast nær örugglega að Trump: Ohio, Iowa, Arizona, Flórída, Norður-Karólína og Michigan. Ljóst er þó að á brattann er að sækja fyrir Trump fyrir kosningarnar sem fara fram aðfaranótt miðvikudags að íslenskum tíma.