Gera göngukort fyrir Ingólfsfjall

Ferðafélag Árnesinga hyggst gera kort um gönguleiðir um og yfir Ingólfsfjall.

„Til framtíðar litið er mikilvægt að göngufólki og almenningi séu veittar ábyrgar upplýsingar um gönguleiðir sem taldar eru öruggar á og við Ingólfsfjall,“ segir í bréfi ferðafélagsins til þeirra sem eiga lönd í fjallinu með ósk um leyfi fyrir kortagerðinni.

„Á undanförnum árum hafa því miður hent slys og óhöpp sem rekja má til fákunnáttu fólks um gönguleiðir á þessu svæði,“ rekur ferðafélagið, sem leggur til sex aðkomustaði að fjallinu. Tekið er fram að gönguleiðir fari ekki um ræktarlönd og að tröppur verði settar yfir girðingar.

Fréttin birtist fyrst í Fréttablaðinu.