Mikill meirihluti Íslendinga kaupir aldrei hvalkjöt

Mikill meirihluti Íslendinga kaupir aldrei hvalkjöt samkvæmt niðurstöðum nýrrar skoðunarkönnunnar. Um helmingur landsmanna styður þó hvalveiðar en andstaða við veiðarnar vex nokkuð á milli ára.

Þetta er meðal þess sem kemur fram í skoðanakönnun sem International Fund for Animal Welfare (IFAW) lét Gallup framkvæma fyrir sig á dögunum. Þar kemur fram að 81 prósent aðspurðra segjast aldrei kaupa hvalkjöt. Aðeins 1,5 prósent aðspurðra segist kaupa hvalkjöt sex sinnum eða oftar á ári.

Atvinnuveiðar á hvali hófust að nýju á Íslandi árið 2006 og tók neysla hvalkjöts þá kipp á árunum á eftir. Árið 2010 sögðust um helmingur landsmanna kaupa hvalkjöt einu sinni eða oftar. Neyslan hefur þó minnkað jafnt og þétt á undanförnum árum en nú sex árum síðar, er sú tala kominn niður í nítján prósent. Lítið er veitt af hrefnu á hverju ári eða 20-30 dýr árlega.

Sjá einnig: Taka hvalkjöt úr verslunum sínum á Húsavík

Líkt og greint var frá í fréttum Stöðvar 2 fyrr á árinu eru það helst erlendir ferðamenn sem neyta hvalkjöts hér á landi og sagði Sigursteinn Másson, talsmaður IFAW hér á landi að ljóst væri að erlendir ferðamenn héldu uppi hrefnuveiðum með neyslu á hrefnukjöti.

IFAW hefur barist fyrir því að Íslendingar hætti hvalveiðum og afhenti nýlega sjávarútvegsráðherra yfir hundrað þúsund undirskriftir ferðamanna og Íslendinga sem lofa að borða ekki hvalkjöt og hvetja stjórnvöld til að stöðva veiðarnar.

Rétt rúmlega helmingur styður sérstakt griðasvæði hvala í Faxaflóa

Stuðningur við hvalveiðar mælist svipaður og á síðasta ári þegar IFAW lét framkvæma sambærilega könnun., 50,7 prósent segjast styðja hrefnuveiðar og 41,8 prósent segjast styðja veiðar á langreyðum.

Andstaðan vex nokkuð á milli ára og umtalsvert sé borið saman við árið 2013. Þeim sem alfarið segjast hlynntir veiðunum fækkar nú mest á milli ára eða úr 18,4 prósent niður í 14,4 prósent í tilfelli hrefnuveiða og úr 17,1 prósent niður í 13,4 prósent þegar veiðar á langreyðum eru annars vegar.

50,6 prósent landsmanna svarenda segjast styðja það að Faxaflói verði gerður að griðasvæði fyrir hvali en 20,5 prósent eru því andvig. Hluti Faxaflóa er nú þegar griðasvæði fyrir hvali en í maí 2013 gaf þáverandi sjávarútvegsráðherra, Steingrímur J. Sigfússon, út reglugerð þar sem dregin var lína frá Garðskagavita norður að Skógarnesi á Snæfellsnesi. Með því var griðasvæðið stækkað.

Skömmu síðar, eða í júlí 2013, þegar ný ríkisstjórn hafði tekið við var griðasvæðið minnkað aftur í fyrra horf og nær það nú frá Garðskagavita að Akranesi. Hefur verið skorað á ríkisstjórnina að stækka griðasvæðið, meðal annars af Reykjavíkurborg.

Hvalveiðar Íslendinga hafa í gegnum tíðina verið umdeildar. Bandaríkjaforseti hefur gagnrýnt þær, Gunnar Bragi Sveinsson ráðherra hefur sagt þær skaða ímynd Íslands og erlendir tölvuþrjótar ítrekað gert árásir á íslenskar vefsíður í mótmælaskyni við þær

Ljóst er þó að hvalveiðarnar virðast hafa lítil sem engin áhrif á straum ferðamanna hingað til lands sem hefur vaxið gríðarlega undanfarin ár. Þá gaf utanríkisráðuneytið út skýrslu fyrr á árinum um áhrif hvalveiða á samskipti Íslanda og annarra ríkja.

Niðurstaða hennar var m.a. að ekki væru unnt að sjá að ákvarðanir Bandaríkjaforseta, í tengslum við hvalveiðar Íslendinga, hafi haft nokkur teljandi áhrif á viðskiptalega hagsmuni eða diplómatísk samskipti ríkjanna.