Gleymdist að loka og læsa hnífaskúffunni

Aðalmeðferð í manndrápsmáli, sem kennt er við Miklubraut, lauk í vikunni. Ríkissaksóknari ákærði 39 ára karlmann fyrir að hafa orðið manni að bana í búsetukjarna fyrir geðfatlaða við Miklubraut þann 22. október í fyrra. Í skýrslutökum kom fram að ekkert eftirlit var haft með lyfjagjöf mannsins en hann er greindur með geðklofa.

„Þetta er auðvitað heimili fólks en ekki heilbrigðisstofnun. Það er mikilvægt að hafa það í huga. Í einhverjum tilvikum er verið að fylgjast með því hvernig fólk tekur lyfin sín en það er alfarið undir stjórn eða áætlun sem heilbrigðisstofnun eða læknir setur fram,“ segir Stefán Eiríksson, sviðsstjóri velferðarsviðs Reykjavíkurborgar.

Við aðalmeðferð kom fram að lyf sem maðurinn hefði átt að taka hefðu fundist í miklu magni í herbergi hans og að gleymst hefði að læsa hnífaskúffu sem geymdi morðvopnið. Myndir í dómskjölum sýna greinilega að neysla fíkniefna átti sér stað innandyra í búsetukjarnanum.

„Ástandið slær mann illa, sem hefur viðgengist þarna. Það er alveg ljóst að þarna eru menn í mjög slæmu ástandi,“ segir Bjarni Hauksson hrl. og verjandi mannsins.

Sigurður Pálsson geðlæknir hefur haft manninn, sem ákærður er fyrir manndrápið, til meðferðar. Fyrir dómi vitnaði Sigurður um ástand mannsins og sagði vera mikinn mun á honum, núna þegar hann væri aftur farinn að taka lyfin.

Maðurinn er ákærður fyrir að hafa veist að 59 ára sambýlismanni sínum með hnífi og stungið hann að minnsta kosti 47 stungum í líkamann, með þeim afleiðingum að sá sem hann réðst á hlaut bana af.

Ákæruvaldið krefst þess aðallega að maðurinn verði dæmdur til refsingar en til vara að honum verði gert að sæta öryggisgæslu á viðeigandi stofnun. Dómur verður kveðinn upp í byrjun nóvember. 

Fréttin birtist fyrst í Fréttablaðinu