Instagram er ekkert bara fyrir „fyrirmyndarlíkamana“

„Ég vaknaði  bara einn morguninn og sá að Insta­gramið mitt var sprungið,“ segir Tara Margrét Vilhjálmsdóttir. Tara er líklega ein af fyrstu íslensku yfirstærðarfyrirmyndunum á Instagram og hefur sannarlega vaxið fiskur um hrygg hraðar en hún gat ímyndað sér.

Frá því að Tara opnaði fataskápinn sinn fyrir alþjóð í Fréttablaðinu fyrr í sumar hefur hún varla getað lokað honum.

Vegna þrýstings opnaði hún svo Insta­gram-reikninginn sinn fyrir almenningi og þá varð ekki aftur snúið. Hún var orðin að fyrirmynd sem ungar stúlkur hafa beðið eftir.

Og ekki skemmdi fyrir þegar Insta­gram-stjarnan FullfiguredFashion með fylgjendur á pari við íslensku þjóðina, hoppaði á vagninn og deildi myndum frá Töru. „Þetta er ótrúleg upplifun,“ segir hún sæl.

„Mig óraði nú ekki fyrir þessu, viðbrögðin við tískuþættinum voru svo miklu meiri en við nokkrum pistli sem ég hef skrifað um málefnið. En þetta var risastórt skref fyrir mig og snerist ekki um það sem ég hef að segja heldur um líkama minn, sem ekki snýst um þessa hefðbundnu fegurð eða fellur undir hugtakið fyrirmyndarlíkami. Ég viður­kenni að ég var ótrúlega stressuð yfir þeim kommentum sem ég gæti fengið og var búin að brynja mig vel. Þau bara komu ekki,“ segir hún glöð. “

Eðli málsins samkvæmt er Tara yfir sig ánægð með að líkams­ímyndar­skilaboðin hennar virðast falla vel í kramið og segir gríðarlega mikilvægt að hugmyndir um eitthvað eins og OOTD, eða dress dagsins, sé ekki fyrirbæri sem eyrnamerkt sé einhverri fyrirframgefinni líkamsgerð.

„Ég er ekki þessi hefðbundna líkamsgerð í tískuþætti og þetta er greinilega eitthvað sem þurfti. Það þurfti einhver feit manneskja að stíga fram. Ég er feit kona og ég tek orðið feit bara aftur til mín. Það er valdeflandi að stíga svona fram,“ segir hún og er afar stolt af þeim sem fylgt hafa í kjölfarið, en fjölmargar hafa sett sig í samband við hana í því samhengi.

„Það skiptir svo miklu máli að við sjáum aðra líkama en þessa svokölluðu fyrirmyndarlíkama í flottum fötum. Fatlaðir, feitir eða hvað sem er verða að sjást líka,“ segir hún ákveðin og bendir á að frá því hún fór að láta til sín taka á Insta­gram, hafi fyrirspurnum um hvar hún fái fötin sín rignt inn, svo greinilega sé gat í markaði sem einhverjir ættu að stökkva á hið snarasta.

„Það er frekar merkilegt fyrir mig að upplifa hversu pólitískt afl líkaminn er, rétt eins og orðin,“ segir Tara og segist vona innilega að fleiri feti í hennar fótspor. „Heilsufarið er svo margþátta fyrirbæri sem einskorðast ekki aðeins við ákveðna líkamsmynd. Jákvæð líkamsmynd og sjálfsmynd vegur mjög þungt í heildarmyndinni,“ segir hún einlæg að lokum.