Mynd sem þræðir sig um heiminn

Hugmyndin kemur í rauninni frá þessari byltingu sem hefur orðið í þessum hefðbundnu listum. Þetta kom frá The Great British Bake Off, bökunarsjónvarpsþætti í Bretlandi– þá var það bakstur, sem er hefðbundinn og fólk var ekkert endilega að hugsa mikið um, sem varð þar gríðarlega vinsæll í kjölfarið á þættinum – allir að tala um bakstur og allir að baka. Heather, meðframleiðandi og einn leikstjóri myndarinnar, var að hugsa um hvað yrði næsta stóra trendið og það var garnið,“ segir Þórður Jónsson, framleiðandi og meðleikstjóri heimildarmyndarinnar Yarn, eða Garn.

„Það hefði verið hægt að fara margar leiðir í að gera heimildarmynd um garn – leiðin sem við fórum var að gera heimildarmynd um endalausa möguleika garns. Í stað þess að fara mjög djúpt í söguna þá ákváðum við að sýna hvað er hægt að gera með garnið og fólk sem er að gera ótrúlega hluti með garnið og mikið hvernig hægt er að nota garnið á listrænan máta.“

Í Garni er fylgst með fólki sem notar garnið í sköpun á mjög mismunandi og kannski óhefðbundinn máta. Þarna er fylgst með Tinnu sem „graffar“ úr garni, hinum sænska Cirkus­ Cirkör sem prjónar tilfinningar sínar og tjáir sig í gegnum garnið, Toshiko sem heklar leikvelli fyrir börn til að leika sér í og listakonunni Olek sem er búsett í New York og heklar til dæmis utan um lestir og manneskjur. Í myndinni er þetta fólk elt til ellefu landa í heiminum.

„Myndin hefur gengið mjög vel. Hún fór á Gautaborgarfestivalið, South by Southwest í Bandaríkjunum og Galway Film Fleadh á Írlandi. Núna sýnum við hana á Íslandi – síðan eru það 40 til 50 borgir á Englandi og 50 borgir í Bandaríkjunum í október. Þannig að það er allt að gerast.“

Frumsýningin verður þó ekki alveg hefðbundin en þar verður í boði samprjón fyrir áhorfendur.

„Núna á frumsýningarkvöldinu og yfir helgina ætlum við að hafa samprjón, eða „knit along“ eins og það heitir upp á ensku – þá dimmum við ljósin í salnum þannig að það sé ekki alveg kolniðamyrkur og fólk kemur síðan með eigin prjóna og garn eða það getur tekið prjóna og garn úr körfu í anddyrinu, það getur líka komið með eitthvað hálfklárað sem það á. Það sem verður svo prjónað förum við með og deilum á milli Kvennaathvarfsins og Konukots. Við gerðum þetta í Svíþjóð og það vakti rosalega mikla lukku.

Það er bara á færi örfárra hannyrðameistara að prjóna í kolniðamyrkri – annars væri fólk bara að koma út úr salnum búið að prjóna og hekla í gegnum hendurnar. Það verður nógu dimmt til að njóta myndarinnar en nógu bjart til að sjá hvað maður er með í höndunum og ná að prjóna,“ segir Þórður hlæjandi að lokum.

Garn verður frumsýnd í Bíó Paradís í kvöld klukkan sex.