Tom Cruise hefur ekki séð dóttur sína í um það bil þrjú ár

Hin tíu ára gamla Suri Cruise á í engu sambandi við föður sinn, Hollywood stjörnuna Tom Cruise. Frá þessu er sagt á vef US Weekly. Feðginin sáust síðast saman opinberlega í ágúst árið 2012, stuttu eftir skilnað Cruise og Katie Holmes, móður Suri.

Holmes og Cruise byrjuðu saman vorið 2005 og trúlofuðu sig í júní sama ár. Frægt er orðið þegar Cruise tilkynnti um trúlofun þeirra í spjallþætti Oprah Winfrey, þar sem hann hoppaði á sófanum hjá spjallþáttadrottningunni. Dóttir þeirra Suri fæddist í apríl 2006 og giftu þau sig í nóvember sama ár.

Holmes sótti um skilnað frá Cruise í júní árið 2012 en þau sáust síðast opinberlega saman í Reykjavík það sumar, en parið dvaldi hér á landi þegar Cruise var við tökur á stórmyndinni Oblivion.

Þegar parið skildi var talið að Holmes hafi ekki viljað að dóttir hennar yrði alin upp innan Vísindakirkjunnar, en Cruise er einn þekktasti meðlimur hennar. Síðan hafa bæði Suri og móðir hennar misst allt samband við Cruise vegna trúar hans. Cruise hittir enn eldri börn sín sem hann á með leikonunni Nicole Kidman, en þau eru bæði meðlimir í kirkjunni.