Leita að fallegum heimilum á Íslandi fyrir nýjan sjónvarpsþátt

Stöð 2 leitar að fallegum heimilum á Íslandi fyrir glænýjan sjónvarpsþátt sem fer í loftið á næsta ári.

Sérfræðingarnir Gulla Jónsdóttir, arkitekt og hönnuður, Helgi Ómarsson, ljósmyndari og stílisti og Þóra Margrét Baldvinsdóttir, hönnunarráðgjafi og eiginkona Bjarna Benediktssonar fjármálaráðherra, skoða falleg heimili, gefa góð ráð, sýna góðar hugmyndir og fylgjast jafnvel með fyrirhuguðum breytingum ef einhverjar eru.

Í hverjum þætti verða sýnd þrjú heimili sem sérfræðingarnir skoða í krók og kima. Við kynnumst stuttlega heimilisfólkinu sem segir okkur frá hugmyndunum á bakvið hönnun heimilisins.

Leitast verður við að skoða alls konar heimili, jafnt litlar íbúðir sem stór einbýlishús, í höfuðborginni sem úti á landi, jafnt gömul sem ný.

Í lokaþættinum mun Sindri Sindrason, einn helsti fagmaður okkar um falleg heimili, spjalla við sérfræðinga þáttanna og fleiri góða gesti og rifja upp það helsta.  Á sama tíma mun verða netkosning á visir.is þar sem íslendingar geta valið sér sitt uppáhalds heimili.

Markmiðið er að ná fram því sem fallegt er og gleður augað. Það er gert með vandaðri myndatöku, hljóði og eftirvinnslu. Umfjöllunin gengur út á að finna út hvað það er sem gerir fasteign að fallegu heimili.

Sitt sýnist hverjum en svo mikið er víst að það er alltaf fróðlegt að fá umfjöllun um mismunandi arkitektúr, hverfi og hugmyndir manna um híbýli. Síðast en ekki síst er einfaldlega gaman að sjá hvernig aðrir hafa hreiðrað um sig.

Hér er hægt að skrá sitt heimili til leiks.