Splæsti í þriðjudagstilboð Dominos í hverri einustu viku í heilt ár

„Ég kom heim af Þjóðhátíð í fyrra og pantaði mér pítsu á þriðjudeginum. Það var bara svo hentugt,“ segir Hafliði Örn Ólafsson tölvunarfræðingur. Síðan þá hefur ekki liðið þriðjudagur án þess að Hafliði slái á þráðinn til Dominos og panti sér eitt þriðjudagstilboð. „Miðstærð af pítsu með þremur áleggstegundum á þúsund kall.“

Eins og öllum hlýtur að vera ljóst þá er Hafliði mikill pítsukall en hann segir daginn í gær hafa verið súrsætan því að á sama tíma og hann fagnaði þessum merkilega áfanga, að hafa keypt þriðjudagstilboð á Dominos í hverri viku í heilt ár, kvaddi hann sambýlismann sinn. 

„Ég hef verið að leigja út eitt herbergi. Hann fór oft með mér á Dominos en þó ekki alveg jafnoft og ég. En hann Þórarinn var dyggur viðskiptavinur.“ 

Hafliði fer nánast ekki á aðra pítsustaði enda er Dominos í Lóuhólum steinsnar frá heimili hans. „Ég bý í Dúfnahólum, alveg við hliðina á staðnum. Þannig að ég rölti bara yfir, rétti seðilinn og labba út.“ Hann segir að einn starfsmannanna, ung kona, þekki hann meira að segja. „Hún segir: „Ert þú ekki Hafliði?“ og réttir mér pítsuna mína,“ segir Hafliði og hlær en hann segist þó ekki ganga svo langt að líkja staðnum við barinn í hinni vinsælu þáttaröð Staupasteinn eða Cheers. Cheers var í þáttunum barinn „þar sem allir þekkja nafnið þitt“ eins og fram kom í upphafslagi þáttanna. 

En hvernig pítsa varð fyrir valinu í gær?

„Ég passaði mig að halda í hefðina í gær af því að þetta var sérstakt tilefni, fékk mér með pepperóní, beikoni og piparosti. Ég pantaði mér það upphaflega alltaf en svo fór það að verða smá þreytt og þá fór ég að prófa eitthvað annað.“

Hann segist þó aldrei sleppa pepperóníinu.

Hafliði segir þriðjudagstilboðskaupin ekkert sérstakt metnaðarmál hjá sér og að það verði að koma í ljós hvort að hann nái öðru árinu. „Ég fattaði þetta fyrir svona þremur mánuðum, að ég hafði ekki misst úr þriðjudag, og þá ákvað ég að ná í það minnsta heilu ári. Svo erum við í samstarfi við Dominos, við sem erum að skipuleggja Hringinn HRingurinn er tölvuleikjamót í hinum ýmsu tölvuleikjum], þannig að ég kem til með að borða Dominos alla næstu helgi líka.“