Hugsar til langömmu um leið og hún syngur

Við Ágúst syngjum bæði saman og hvort í sínu lagi og dagskráin er valin þannig að hæfi vel þessari virtu sveitakirkju og harmoníumorgelinu en það nafn er notað yfir fótstigið orgel. Tónlistin er trúarleg, veraldleg og þjóðleg,“ segir Sigríður Ósk Kristjánsdóttir sem syngur í Strandarkirkju í Selvogi á morgun ásamt Ágústi Ólafssyni og Jón Bjarnason, organisti Skálholtskirkju, er við hljóðfærið. Sigríður Ósk nefnir Nú vil eg enn í nafni þínu og Almáttugur Guð allra stétta sem dæmi um þjóðlega sálma sem sungnir verða, einnig Maríubænir eftir mismunandi tónskáld. „Ég syng Ave Maríur eftir Bach og Pál Ísólfsson og Ágúst syngur Ave Maríu eftir finnska tónskáldið Oskar Merikanto sem er svona Sigvaldi Kaldalóns þeirra Finna. Ágúst lærði í Sibeliusarakademíunni í Finnlandi og syngur á finnsku. Svo erum við líka með erlend þjóðlög og íslenskar sönglagaperlur. Ég held þetta verði voða fallegt og ég mun hugsa til hennar Grímheiðar Elínar langömmu minnar, sem gerðist organisti í Strandarkirkju þegar hún var ung stúlka.“ Ég bið Sigríði Ósk að fræða mig meira um hana Grímheiði og fæ sögu. „Hún var fædd 1895 og ólst upp á Eyrarbakka sem var mikið menningarþorp á þeim tíma. Þar lærði hún nótnalestur og að spila á orgel. Móðir hennar dó af barnsförum árið 1900 frá fimm börnum og eftir að pabbi hennar giftist aftur og eignaðist fjögur börn í viðbót flutti hann með allan hópinn að Nesi í Selvogi. Þar gerðist langamma organisti í kirkjunni 1915. Systkini hennar urðu aðaluppistaðan í kórnum og hún æfði þau á kvöldin en svo giftist hún og flutti í bæinn 1919.“ Tónleikarnir í Strandarkirkju á morgun nefnast Stóðum tvö í túni og eru þeir síðustu þetta sumarið í tónleikaröðinni Englar og menn í Strandarkirkju sem Björg Þórhallsdóttir sópransöngkona heldur utan um. Þeir hefjast klukkan 14. Aðgangseyrir er 2.000 krónur og enginn posi er á staðnum. Hægt er að kaupa sér kaffi af heimafólki eftir tónleikana.