Hefur ekki hlustað á þættina árum saman

„Frumsýningu á söngleiknum Hárinu hefur verið frestað vegna flösu er eitt fréttskotið sem ég man,“ segir Hrafn Gunnlaugsson kvikmyndaleikstjóri en hann, auk Davíðs Oddssonar og Þórarins Eldjárn voru með skemmtiþáttinn Útvarp Matthildur á árunum 1971-1973. Í dag eru 45 ár síðan þátturinn fór fyrst í loftið.

„Við vorum saman í Menntaskólanum í Reykjavík á þessum tíma og lágu leiðir okkar saman í gegnum félagslífið. Við byrjuðum saman með þessa þætti sem urðu nokkuð vinsælir. Samansafn af bestu sketsunum var svo gefið út á plötu.“

Þáttunum héldu þeir félagar úti í um þrjú ár en fóru svo allir sína leið. „Davíð í stjórnmálin, Þórarinn er rithöfundur og ég er kvikmyndaleikstjóri. Það er auðvitað ákveðinn vinskapur sem fylgir því að vinna svo náið með mönnum og það mynduðust góð tengsl á milli okkar,“ segir Hrafn og bætir við að þessir tímar hafi verið með þeim skemmtilegri sem hann man úr æsku.

Í Útvarpi Matthildi var grín gert að óvæntustu hlutum en mest að stjórnmálamönnum. Hrafn segir að grínið hafi í raun byggst á því að vera ófyndinn. „Við notuðum fréttaþuluna sem allir þekktu og létum líta út fyrir að Matthildur væri sjálfstætt ríki og þaðan voru sendar út fréttir,“ segir Hrafn og útskýrir að þættirnir hafi eflaust verið forveri Spaugstofunnar.

„Þetta var önnur aðferð við að gera grín. Fram að þessum tíma hafði íslenskur húmor gengið að stóru leiti út á það að gera grín að bækluðum, þeim sem stömuðu, feitum eða þeim sem áttu við aðra líkamlega galla að stríða. Þá þótti líka voða fyndið ef menn voru mjög fullir,“ segir Hrafn og vill meina að í þáttunum hafi þessu verið snúið við. „Okkar húmor gekk þvert á móti út á þetta. Við vorum aðallega með paródíur og satírur af stjórnmálamönnum sem var tiltölulega óþekkt þá.“

Hrafn segir að líklega séu grínin úr þættinum óskiljanleg fyrir þá sem ekki voru uppi á þessum tíma. „Ég hef reyndar ekki hlustað á þetta árum saman en hlutir eldast misjafnlega og það gæti vel verið að einhver grín þættu ennþá fyndin í dag.“