Ísland sagt áfangastaður kynlífsþræla

Ísland er áfanga- og viðkomustaður fyrir konur sem hnepptar hafa verið í kynlífsþrælkun sem og fyrir vinnuþræla af báðum kynjum, samkvæmt nýrri skýrslu frá bandaríska utanríkisráðuneytinu. Stjórnvöld eru gagnrýnd í skýrslunni fyrir að taka ekki nægilega vel á glæpum sem þessum.

Farið er yfir mansal á heimsvísu í skýrslunni sem gefin var út nýlega. Þar kemur fram að konur frá Austur-Evrópu, Eystrasaltsríkjunum, Vestur-Afríku og Brasilíu séu fluttar hingað inn til að stunda vændi á næturklúbbum og börum. Þá sé fólk af báðum kynjum frá Afríku, Austur-Evrópu, Suður-Ameríku og Suður- og Austur-Asíu hneppt í nauðungarvinnu. Byggingariðnaður, ferðaþjónusta, og veitingastaðir er á meðal þess sem nefnt er sérstaklega í því samhengi.

Í skýrslunni segir jafnframt að erlendir starfsmenn sem starfa tímabundið utan lögbærs ríkis séu í mikilli hættu á að lenda í nauðungarvinnu hér á landi. Þrælahaldarar greiði þeim laun í heimalandinu og geri samning við þá um að vinna á Íslandi í 183 daga, og að þannig forðist þeir skatta og stéttarfélagsgjöld hér á landi. Þannig takmarki það möguleika stjórnvalda á að fylgjast með vinnuumhverfi og launum. Tekið er fram að stjórnvöld hér á landi beiti aðeins lágmarksaðgerðum til þess að bregðast við mansali.

Þá er vísað til þess að undanfarin þrjú ár hafi enginn verið sakfelldur fyrir mansal eða þrælahald. Ráðuneytið leggur því til að þjálfun og fræðsla lögreglu, saksóknara og dómara verði aukin svo það verði auðveldara að þekkja einkenni mansals.