Fótbrotnaði í gæsapartýinu sínu: „Ég er hræðileg á dansgólfinu“

Ásdís Rósa Hafliðadóttir, laganemi, gengur í það heilaga eftir einn og hálfan mánuð og því skipulögðu vinkonur hennar heljarinnar gæsun í gærdag henni til heiðurs. Dagurinn var troðfullur af viðburðum, bubblubolta og þyrluflugi, en Ásdísi tókst að slasa sig alveg í lok dags þegar skorað var á hana að taka nútímadans í gæsapartýinu.

Ásdís er trúlofuð grafíska hönnuðinum Hirti Hjartarsyni.

„Ég fór í þyrluferð upp á Esjuna og í svona fótbolta þar sem maður er í einhvers konar blöðru,“ segir Ásdís og á við svokallaðan bubblubolta sem vinsæll er í bæði gæsunum og steggjunum. „Það hefði verið svalara að slasa sig þar.“

Eftir kubb og sund fóru vinkonurnar í grillpartý heim til einnar í skipulagshópnum þar sem spákonan Sigga Kling skemmti mannskapnum. „Það var svolítið drukkið og svo þegar liðið var á kvöldið kom fram ósk um að ég myndi taka nútímadans. Ég tók heljarinnar spor með þessum afleiðingum,“ segir Ásdís og hlær. Hún fór í morgun á slysavarðstofuna og þá kom í ljós að hún hafði ristarbrotnað í dansinum. Hin tilvonandi brúður hlær að atvikinu og tekur því í raun með ótrúlegu jafnaðargeði. 

„Þetta er bara góður endir á degi, allavega mjög eftirminnilegur. Ég verð í gifsi allavega í mánuð en sem betur fer er brúðkaupið ekki fyrr en eftir einn og hálfan. Ég væri ekki svona hress ef ég væri að fara að labba inn kirkjugólfið í gifsi.“ 

Nú stendur yfir mikið brúðkaupstímabil á Íslandi og fundu fjölmargir fyrir því á samfélagsmiðlum í gær en 16. júlí virðist hafa verið einkar vinsæll til hátíðarhalda. 

Mjölnir skaðabótaskyldur vegna beinbrots í steggjapartýi

Ásdís segir það ekki algjörlega úr karakter að slasa sig svona. 

„Ef einhver slasar sig í gæsun þá er það ég. Ég vil því meina að vinkonur mínar hafi verið mjög útsjónarsamar að græja þessa gæsun núna þegar enn er einn og hálfur mánuður í stóra daginn.“ 

Þetta er ekki í fyrsta sinn sem manneskja slasar sig í gæsun eða steggjun en í fyrra stefndi steggur Mjölni vegna þess að hann fótbrotnaði í steggjun hjá fyrirtækinu. Héraðsdómur viðurkenndi í mars að Mjölnir væri skaðabótaskyldur vegna málsins. 

Ásdís lítur bjartari augum á málið og telur slysið ekki koma til með að setja strik í reikninginn þegar kemur að brúðkaupsundirbúningi. „Við erum nýbúin að taka góða syrpu núna, kláruðum flest allt. Ég vona að þetta fari að verða komið núna.“ 

Reyndar er kærasti Ásdísar gamall danskóngur og því hafði hún sagt nýlega við hann að þau þyrftu að fara að æfa brúðarvalsinn. 

„Ég er hræðileg á dansgólfinu eins og kom í ljós í gær. Þannig að ég þarf að taka mjög stífar æfingar í þessar tvær vikur þegar ég losna úr gifsinu,“ segir Ásdís sem verður rúmliggjandi næsta mánuðinn. 

„En þetta gæti verið verra, þegar maður lítur tilbaka þá kannski verður þetta bara mánaðarafslöppun fyrir brúðkaupið.“