Buslað í Bankastræti

Það varð margur blautur í Bankastrætinu í dag en þar var sett upp svokölluð Slip ´N´Slide vatnsrennibraut. Brautin náði marga metra niður strætið en efst var tjald þar sem hægt var að skipta yfir í baðfötin. Brautin var opin á milli 12 og 18 í dag.

Þetta gekk alveg ljómandi vel,“ sagði Geir Finnsson einn umsjónarmanna brautarinnar. „Þó það hafi ekki verið bongó-blíða þá myndaðist alveg rosalega löng röð lengst upp að Dunkin Donuts. Það var fólk á öllum aldri sem renndi sér niður Bankastræti.“

Brautin var þriggja metra breið og var volgt vatn látið renna niður hana. Sundlaug og öryggishlið voru neðst á brautinni til þess að taka á móti þeim sem komu niður á fljúgandi ferð.



Það voru fyrirtækin Nova og Samsung sem stóðu fyrir uppátækinu með góðfúslegu leyfi Reykjavíkurborgar.

Stöð 2 fjallaði um viðburðinn í kvöldfréttatíma sínum. Myndbandsupptökur af fjörinu má því sjá í fréttinni hér fyrir neðan.